मतया लाइन चाःगु उद्योगया मजदुरत आन्दोलनय्
येँ (नेपालभाषा टाइम्स)- नेपाल विद्युत प्राधिकरणं डेडिकेटेड व ट्रंक लाइनया ध्यबा मपूगु धासें थीथी उद्योगया मत चाना बीवं अन ज्या याइपिं मजदुरतय्सं आन्दोलन याःगु दु । रिलायन्स स्पिनिङ मिल्सय् ज्या यानाच्वंपिं मजदुरतय्सं सरकार विरुद्ध आन्दोलन न्ह्याकूगु खः ।
उमिसं ‘उद्योगय् मत मदु, जिपिं सतकय् दु, उद्योगया मत चाये दइ मखु, जिमिगु रोजगारीया ग्यारेन्टी या’ धइगु नारा ब्वयाः म्हिगः विद्युत प्राधिकरणया इटहरी वितरण केन्द्र न्ह्यःने प्रदर्शन याःगु खः । मजदुरतय्सं नेपाल विद्युत प्राधिकरणया इटहरी वितरण केन्द्र प्रमुखयात ज्ञापन पौ नं बिउगु दु ।
उकथं हे म्हिगःनिसें जगदम्बा स्टिलया कर्मचारीतय्सं नं आन्दोलन शुरु याःगु दु । प्राधिकरणं अनया मत लाइन नं चाना बिउगु खः । मजदुरतय्सं आन्दोलनया झ्वलय् सिमरा सबस्टेशनय् धर्ना बिउगु खः । उकथं हे लाइन चाना बिउपिं सर्वोतम सिमेन्ट व लक्ष्मी स्टिलया मजदुरतय्सं नं आन्दोलनया तयारी यानाच्वंगु खँ सीदुगु दु । थीथी उद्योगया मजदुरतय्सं छन्हु निन्हुया दुने उद्योगया समस्या मज्यन धाःसा अझ तःधंक आन्दोलन यायेगु ख्याच्वः नं बिउगु दु ।
सरकारं मतया लाइन चाना बीवं थीथी उद्योगया १२ हजार मजदुर प्रभावित जूगु खँ धाःगु दु । थुकी नं विशेष यानाः ज्यालादारी मजदूरत प्रभावित जूगु दु । प्राधिकरणं ध्यबा मपू धासें गुंगू उद्योगया मत चाना बिउगु खः ।
प्राधिकरणं जगदम्बा स्टिल्स, रिलायन्स स्पिनिङ मिल्स, घोराही सिमेन्ट, अर्घाखाँची सिमेन्ट, सर्वोत्तम सिमेन्ट, लक्ष्मी स्टिल, त्रिवेणी स्पिनिङ मिल्स, अशोक स्टिल व सोनापुर मिनरल्स एन्ड आयल उद्योगया लाइन चाना बिउगु खः । मत मदयाः उद्योग बन्द जुइवं उद्योगीतय्सं प्रधानमन्त्री नापलायेगु कुतः याःसां सफल मजूगु खँ धाःगु दु । उद्योगीतय्सं समस्या ज्यंकेगु नितिं थःपिं मध्यमार्गी लँपुइ वनेत व लचक जुइत तयार दुगु खँ धाःगु दु ।
नेपाल विद्युत प्राधिकरणं देशय् चरम लोडसेडिङ जूगु अवस्थाय् छुं उद्योगयात अतिरिक्त शुल्क कायेगु कथं मत बिउगु खः । तर उकिया भुक्तानी धाःसा मजूगु खँ धाःगु दु ।
थ्वहे झ्वलय् नेपाल चेम्बर अफ कमर्सं डेडिकेटेड व ट्रंक लाइन विद्युत महसुल सम्बन्धय् न्यायोचित समाधान मालेत इनाप याःगु दु । चेम्बरं प्राधिकरण व उद्योगी दथुइ मतभिन्नता जुयाः थुकिं समग्र लगानी व व्यवसायया मैत्रीपूर्ण वातावरणय् बांमलाःगु लिच्वः लाकीगु खँ धाःगु दु ।
LEAVE YOUR COMMENTS