ललित अन्तर्राष्ट्रिय व्यापार मेला सुरु

यल –  निक्वःगु ललित अन्तर्राष्ट्रिय व्यापार मेला बुधवाः निसें सुरु जूगु दु । यल पूच्वःया नत्वालय् म्हिगः छगू ज्याझ्वःया दथुइ उपराष्ट्रपति नन्दबहादुर पुनं महोत्सवया उलेज्या यानादीगु खः । उलेज्याझ्वलय् न्ववानादिसें वय्कलं सरकारं थःगु स्रोत, वैदेशिक लगानी व निजी ख्यःया लगानी लिसें जनतायाके दुगु चिचिधंग पुँजी संकलन यानाः लगानीयात उच्च प्राथमिकता बीमाःगु खँ धयादिल ।

ज्याझ्वलय् न्ववानादिसें ललितपुर उद्योग वाणिज्य संघया अध्यक्ष कृष्णलाल महर्जनं यल जिल्ला राजधानीया लिक्क लाःगु जूसां आर्थिक विकास व पूर्वाधारया दृष्टिं लिउने लानाच्वंगु खँ धयादिल । नकतिनि हे जक सरकारं ग्वसाः ग्वःगु लगानी सम्मेलनया सोकेसय् न्ह्यब्वःगु ७७ गू परियोजनाय् यलया छगू नं परियोजना मलाःगु खँ न्ह्यथँसें वय्कलं धयादिल ‘यलय् अन्तर्राष्ट्रिय सम्मेलन केन्द्र लिसें पर्यटकीय पूर्वाधार, होटल, केबुलकार, साहसिक पर्यटन, हस्तकला क्षेत्रय् लगानीया यक्व हे परियोजना संचालन यायेफइगु खः, तर यलपाखें छगू हे परियोजना मलाःगु धयागु देय्या निंतिं हे दुर्भाग्यपूर्ण खः ।’

थ्व झ्वलय् वय्कलं सिंहदरबारया मिखा न्हापालिपा थें थ्व पालय् नं यलय मलाःगु गुनासो यानादिल । ज्याझ्वलय् न्ववासें वय्कलं यलया भिंद्यः देगः पुननिर्माणया निंतिं स्रोत मुंकेगु ज्या नं जुयाच्वंगुलिं ग्वाहालि यायेत नं इनाप यानादीगु खः । उगु देगः पुनःनिर्माणया निंतिं न्यागू करोड तका तुइगु अनुमान यानातःगु दु ।संघया वरिष्ठ उपाध्यक्ष भरतलाल जोशीं हस्तकला क्षेत्र हे संकटय् लानाच्वंगु इलय् वल्र्ड क्राफ्ट काउन्सिलं यलयात विश्वया ३५ औं हस्तकला नगर घोषणा याःगु खँ न्ह्यथँसें उगु घोषणा कथं यल महानगरपालिकां आः ठोस पलाः ल्ह्वनेमाःगु खँय् ध्यानाकर्षण यानादिल ।

ज्याझ्वलय् संघया उपाध्यक्ष किशोर प्रधान, यल क्षेत्र नं. ३ या सांसद पम्फा भुसाल, यल महानगरपालिकाया मेयर चिरिबाबुर महर्जन, संघया सचिव मनोजबहादुर न्याछ्योंपिंसं नं न्ववानादीगु खः । यल उद्योग वाणिज्य संघया ५२ औं स्थापना दिवसया लसताय् जुयाच्वंगु थ्व ब्वज्या न्यान्हुतक न्ह्याइ । सछिगू स्टल दुथ्याःगु ब्वज्याय् प्यंगू देय्या स्वीगू स्टल दुगु खँ नं ग्वसाः खलकं धाःगु दु । ब्वज्या थीथी वसः, दैनिक उपभोग्य ज्वलं, साजसज्जाया ज्वलं निसें हस्तकला, धातुकलाया ज्वलं ब्वयातःगु दु ।

सम्बन्धित बुखँ

LEAVE YOUR COMMENTS