मत चुहावट जक म्हो यानाः ७ अर्ब आम्दानी
येँ – नेपाल विद्युत प्राधिकरणं मतया चुहावट म्हो यायेत रणनीतिक रुपं ज्या याना वनीगु जूगु दु । चालु आर्थिक दँय् प्राधिकरणं क्वःछिनातःगु योजना शतप्रतिशत कार्यान्वयन जुल धाःसा वितरण पाखेया चुहावट ८.५ प्रतिशतय् सीमित जुइ । थौंकन्हय् वितरणपाखे चुहावट ११.२८ प्रतिशत जुयाच्वंगु दु ।
प्राधिकरणय् थुकी २.७८ प्रतिशत म्हो यानाः वितरणपाखेया चुहावट ८.५ प्रतिशतय् सीमित यायेगु लक्ष्य तयातःगु दु । प्राधिकरणं थःगु न्हय्गुलिं प्रादेशिक व निगू प्रदेश डिभिजन कार्यालय व थ्व अन्तर्गतया हरेक वितरण केन्द्रयात विद्युत चुहावट नियन्त्रणया लक्ष्य बियाः उकथं हे ज्या यायेत परिपत्र यायेधुंकूगु दु ।
प्राधिकरणय् कार्यकारी निर्देशकय् कुलमान घिसिङयात नियुक्त याःगु इलय् प्रणालीं २५.७८ प्रतिशत चुहावट दुगु खः । उकियात स्वदँया दुने १५.३२ प्रतिशतय् क्वत हःगु खः । थ्व ई दुने कूल १०.४६ प्रतिशत चुहावट म्हो यायेफुगुलिं न्हय्गू अर्ब थप आम्दानी जूगु प्राधिकरणया तथ्यांक दु ।
आर्थिक दँ २०७२÷७३ य् च्यागू अर्ब ८९ करोड घाटाय् दुगु प्राधिकरण घिसिङ कार्यकारी निर्देशक जुइधुंकाः वंगु आर्थिक दँय् न्हय्गू अर्ब २० करोड खुद नाफाय् थ्यंगु दु । प्राधिकरणं चुहावट नियन्त्रणया निंतिं चोरी नियन्त्रण यायेगु, महसुल बक्यौता असुलीइ कडाइ यायेगु, प्राविधिक चुहावट म्हो यायेत ट्रान्सफर्मर, वितरण लाइन व सवस्टेशनया सुदृढीकरण यायेगु व थप यायेगु ज्यायात अभियान कथं हे न्ह्याकूगु खः ।
प्राधिकरणं गैर प्राविधिक चुहावट नियन्त्रणया निंतिं बन्द मिटर हिलेगु, मिटर कायेत प्रोत्साहित यायेगु व मिटर रिडिङ्ग मजूपिं ग्राहकत म्हसिइकेगु थेंज्याःगु ज्या नं अभियान कथं हे न्ह्याकूगु खः । मिटर कायेत प्रोत्साहित यायेगु निंतिं सुकुम्बासीतय्त नं सहज रुपं मिटर बीगु, स्थानीय तहया सिफारिश मदुसां मिटर जडान यानाबीगु, तसकं विपन्नतय्त निःशुल्क मिटर बीगु ज्या याःगु खः ।
प्राधिकरणया लक्ष्य पूवंकेगु निंतिं यक्व विद्युत चुहावट जुयाच्वंगु वितरण केन्द्रयात अप्वः व म्हो जक चुहावट जुयाच्वंगु केन्द्रयात म्हो हे चुहावट नियन्त्रण यायेगु लक्ष्य बिउगु खः । प्राविधिक व गैरप्राविधिक चुहावट नियन्त्रणया निंतिं देय्न्यंकंजुयाच्वंग्ु अभियानयात अझ सशक्त व प्रभावकारी दयेकेगु खँ कार्यकारी निर्देशक घिसिङं धयादीगु दु ।
वय्कलं चुहावट नियन्त्रणया लिसें ग्राहकतलिसे प्रत्यक्ष सम्पर्क तइगु वितरण केन्द्रया संस्थागत सुशासन व जनतालिसे स्वापू सुधार यायेगु ज्यायात नं कडापूर्वक लागू यानागु खँ धयादीगु दु । वितरण कार्यालयय् वित्तीय अनुशासन कायम यायेत केन्द्र, लेखा व स्टोर प्रमुखयात जिम्मेवार व जवाफदेशी दयेकेगु योजना प्राधिकरणया दु ।
‘आःया जिमिगु मू लक्ष्य सेवा प्रवाहय् सुधार व सुशासन हे खः । सेवाग्राहीयात दुःख बीगु व उपिंपाखें म्वाःमदुगु लबः कायेत स्वइपिं कर्मचारीयात तुरन्त कारवाही यायेगु जुइ’ वय्कलं धयादिल । ग्राहकया मिटर रिडिङ मयासें स्टक तयातइपिं वितरण केन्द्रया प्रमुखयात तुन्त व यदि वयागु सुरुवा जूगु जुल धाःसा व पुलांगु कार्यालय अन्तर्गत ग्राहकय् स्टक युनिट तयातःगु लुत धाःसा अज्याःपिं प्रमुखयात नं कारवाहीया दायराय् हयेगु खँ नं वय्कलं धयादीगु दु ।
प्राधिकरणयाके दुगु स्रोतयात अधिकतम प्रयोगय् हयेगु खँ न्ह्यथँसें वय्कलं कार्यालयय् स्टक दुगु विद्युतया पोल, तार, ट्रान्सफर्मर थेंज्याःगु उपकरणया अधिकतम प्रयोग यायेगु खँ नं धयादिल । कमिसनया लोभय् वितरण केन्द्र प्रमुख, लेखा व स्टोर प्रमुखया मिलेमतोय् अनावश्यक सामान न्याइगु द्वपं नं लानाच्वंगु दु ।
थुकियात नियन्त्रण यायेफत धाःसा नं दँय् करोडौं तका बचत जुइगु प्राधिकरणया कर्मचारीतय्सं धायेगु यानाच्वंगु दु । दकलय् अप्वः राजश्व मुंकीगु स्वनिगःया प्रादेशिक कार्यालययात वंगु दँय् ७.४० प्रतिशत चुहावटयात ५.७७ प्रतिशतय् क्वत हयेगु लक्ष्य बिउगु खः । कार्यालय अन्तर्गत नीगू वितरण केन्द्र दु ।
३ नम्बर प्रदेशया हेटौंडा प्रदेश कार्यालय अन्तर्गत ७.३८ प्रतिशत दुगु चुहावटयात ५.७५ प्रतिशतय् क्वत हयेगु लक्ष्य बिउगु खः । थ्व कार्यालय अन्तर्गत खुगू वितरण केन्द्र दु । अथेहे प्रदेश १ या प्रोदशिक कार्यालय विराटनगरयात ८.८७ प्रतिशतया लक्ष्य बियातःगु दु । थ्व कार्यालय अन्तर्गत २४ गू वितरण केन्द्र दु ।
प्रदेश २या प्रोदशिक कार्यालययात १५.४८ प्रतिशत चुहावटयात १०.९७ प्रतिशतय् क्वत हयेगु लक्ष्य बियातःगु दु । थ्व कार्यालय अन्तर्गत २३ गू वितरण केन्द्र दु। अथेहे गण्डकी प्रदेशया पोखरा प्रादेशिक कार्यालययात १०.४३ प्रतिशत चुहावटयात ७.९० प्रतिशतय् क्वत हयेगु लक्ष्य बियातःगु दु । थुकिया अन्तर्गत १३ गू वितरण केन्द्र दु ।
अथेहे प्रदेश ५ या बुटवल प्रादेशिक कार्यालयं १२.३६ प्रतिशतया चुहावटयात ९.२६ प्रतिशतय् क्वत हयेमाःगु दु । थ्व कार्यालय अन्तर्गत ११ गू वितरण केन्द्र दु । प्रदेश ५ या हे प्रदेश कार्यालय नेपालगञ्जं चुहावटयात ८.०५ प्रतिशतय् क्वत हयेमाःगु जूगु दु । थ्व अन्तर्गत १० गू वितरण केन्द्र दु ।
कर्णाली प्रदेशया प्रादेशिक कार्यालय सुर्खेतयात १९.९० प्रतिशत चुहावट दुगुयात १४.५७ प्रतिशतय् क्वत हयेगु लक्ष्य बियातःगु दु । थ्व कार्यालय अन्तर्गत १० वितरण केन्द्र दु । सुदुरपश्चिम प्रदेशया प्रादेशिक कार्यालय अत्तरियायात १४.३९ प्रतिशतया चुहावटयात १०.६९ प्रशिशतय् क्वत हयेगु लक्ष्य बियातःगु दु ।
थ्व कार्यालय अन्तर्गत १२ गू वितरण केन्द्र दु । प्राधिकरणं थःम्हं प्रवाह यायेगु सेवा सुधारय् हयेत व विद्युत चुहावटयात नियन्त्रण यायेगु लक्ष्य तयाः प्रादेशिक व प्रदेश कार्यालय व वितरण केन्द्रलिसे कार्यसम्पादन सम्झौता यायेगु याना वयाच्वंगु दु ।
LEAVE YOUR COMMENTS