मंसिर ७ या ज्याझ्वः बारे सुरक्षा चिउताः

येँ (नेपालभाषा टाइम्स)- थ्वहे वइगु मंसिर ७ गते छखे दुर्गा प्रसाईंया जुजुवादी कार्यकर्तातय्सं येँय् तःजिक प्रदर्शन यायेगु धकाः तयारी यानाच्वंगु दुसा मेखे एमाले समर्थित युवा संघं वकुन्हु हे येँय् प्रदर्शनया ज्याझ्वः तयाः प्रसाईंयात हाथ्या बिउगु दु । थुकिं यानाः मंसिर ७ गते येँय् छु गज्याःगु भिडन्त जुइगु खः धकाः प्यखेरं चिन्ता शुरु जूगु दु ।

थ्वहे झ्वलय् वकुन्हुया स्वनिगःया शान्ति सुरक्षा बारे गृह मन्त्रालयं नं चिउताः प्वंका हःगु दु । थ्व विषययात कयाः म्हिगः गृह मन्त्रालयय् छगू सहलह ज्याझ्वः नं जुल । गृह मन्त्रालयया सचिव दिनेश भट्टराईया नेतृत्वय् मन्त्रालयय् उगु सहलह जूगु खः । वइगु मंसिर ७ गते मेडिकल व्यवसायी दुर्गा प्रसाईंया नेतृत्वय् ‘राष्ट्र, राष्ट्रियता, धर्म, संस्कृति व नागरिक बचाऔं महाअभियान’ पाखें प्रदर्शन याइगु ज्याझ्वः दुसा मेखे एमाले समर्थित युवा संघं नं वकुन्हु हे प्रदर्शन यायेत्यंगु दु । मन्त्रालयय् थुकिया हे बारे सहलह याःगु खः ।

बैठकय् स्वनिगःया प्रमुख जिल्ला अधिकारीत लिसें सुरक्षा निकायया प्रमुखतय्सं ब्वति काःगु ख ः। युवा संघ व व्यवसायी प्रसाईं पुचलं छन्हुं हे फिब्व ख्यलय् ज्याझ्वः तःगुलिं अन तःधंक ल्वापु जुइ फइगु आशंका जुयाच्वंगु दु । एमालेपाखें महेश बस्नेतया नेतृत्वय् प्रदर्शन जुइत्यंगु खः । बस्नेतं देशय् अप्वयाच्वंगु महंगी, बेरोजगारी व अराजकता विरुद्ध थःपिंसं प्रदर्शन यायेत्यनागु खँ धाःगु दु ।