येँ महानगरया पर्यटन प्रवद्र्धन कोष संचालन कार्यविधि पारित
येँ- येँ महानगरपालिकाया ‘पर्यटन प्रवद्र्धन कोष संचालन कार्यविधि–०७८’ पारित जूगु दु । वंगु मंगलवाः राष्ट्रिय सभागृहय् च्वंगु कार्यपालिकाया बैठकं उगु कार्यविधि स्वीकृत याःगु खः ।
येँ महानगरपालिकाया प्रमुख विद्यासुन्दर शाक्यया अध्यक्षताय् च्वंगु कार्यपालिकाया ७१ गू बैठकं उगु कार्यविधि स्वीकृत याःगु खः । बैठकय् नवासें महानगर प्रमुख शाक्यं करदातां पूगु कर, करदाताया हे सेवाया निंतिं खर्च यायेगु नीतिकथं उगु कोष दयेकागु खः धयादिल । लिसें वय्कलं थुकथं कोषया व्यवस्थां करया दायराय् वये ल्यं दुपिं करदाता नं करया दायराय् वइगु विश्वास नं प्वंकादिल ।
होटल व्यवसायीतय्सं येँ महानगरयात पूगु ध्यबापाखें उगु कोष संचालन यायेत्यंगु खः । आर्थिक दँ ०७५÷७६य् होटल व्यवसायीतय्सं येँ महानगरयात पूगु करया ६५ प्रतिशत ध्यबापाखें उगु कोष संचालन यायेत्यनागु महानगरं न्ह्यथंगु दु ।
महानगरं उगु हे दँय् कोष संचालन यायेगु लक्ष्य काःगु खःसां अबलय् कोरोना महामारीं होटल व्यवसायय् लाःगु समस्याया कारणं संचालन याये मफुगु खः । कोभिडया कारणं लाःगु समस्यायात ध्यानय् तयाः महानगरं उगु इलय् व्यवसायीतय्त आर्थिक ऐनमार्फत ६५ प्रतिशत कर छुट बिउगु खःसा ल्यं दुगु ३५ प्रतिशत दाखिला जूगुलिइ करया ६५ प्रतिशत कोषय् जम्मा यायेत्यंगु खः ।
उगु कोष संचालनया निंतिं येँ महानगर प्रमुखया अध्यक्षताय् छगू निर्देशक समिति नं गठन याःगु दु । उगु समितिइ महानगरपालिकापाखें न्याम्ह, होटल एशोसियसन नेपालया प्यम्ह यानाः मुक्कं गुम्हेसिया निर्देशक समिति जुइ । समितिया मुख्य ज्या वार्षिक बजेट व नीति तथा कार्यक्रम तयार यायेगु नापं नीतिगत प्रबन्ध यायेगु जुइ । अथे हे राजस्व विभागया प्रमुखया संयोजकत्वय् संघया प्रतिनिधिसहितया कार्यान्वयन समिति नं गठन याइगु जूगु दु ।
महानगर दिवस मूल समिति
येँ महानगरपालिकाया २७ औं महानगर दिवस हनेत मूल समारोह समिति गठन याःगु दु । येँ महानगर प्रमुख विद्यासुन्दर शाक्यया संयोजकत्वय् २७ औं महानगर दिवस मूल समारोह समिति गठन याःगु खः । समितिया मेमेपिं दुजलय् उपप्रमुख, प्रमुख प्रशासकीय अधिकृत, कार्यपालिकाया दुजःपिं च्वनादीगु दु ।
थुकथं हे महानगर दिवसकुन्हु बीगु सिरपाःया निंतिं पुरस्कार छनोट, मेमेगु विधागत व क्षेत्रगत ज्याझ्वःया निंतिं थीथी उपसमिति गठन याःगु दु ।
बैठकं डाउन सिन्ड्रोम, अटिजम केयर सोसाइटी नेपाल विशेष स्कुल व पुनःस्थापना केन्द्र नेपाल, मस्तिष्क पक्षाघात स्वावलम्बन समूह नेपाल यानाः प्यंगू सामाजिक संस्थायात आर्थिक ग्वाहालि यायेगु निर्णय नं स्वीकृत याःगु दु ।
LEAVE YOUR COMMENTS