ने. सं. ११४४ कौलाथ्व चौथी -

सर्वोच्चं गज्याःगु फैसला बी थें ?

येँ (नेपालभाषा टाइम्स) – सरकारं संसद भंग याःगु विरुद्ध सर्वोच्च अदालतय् लानाच्वंगु मुद्दायात कयाः थीथी कथंया विश्लेषण शुरु जूगु दु । सरकार विरुद्ध लाःगु मुद्दायात वंगु बिहीवाः प्रधानन्यायाधीश चोलेन्द्र शम्शेर जबरां सर्वोच्च अदालतया संवैधानिक इजलासय् छ्वःगु खःसा शुक्रवाः सरकारयात ससद विघटन बारे कारण देखाउ आदेश जारी याःगु दु । तर सर्वोच्च अदालतं कारण देखाउ आदेश जारी याःसां सर्वोच्चया निर्णय छु जुइ धइगु जिज्ञासा सर्वसाधारण जनताय् ब्वलनाच्वंगु दु ।

थ्वहे झ्वलय् कानुन व्यवसायीतय्सं धाःसा उकियात कयाः आः हे पुर्वानुमान यायेगु पाय्छि मजूगु खँ धायेगु यानाच्वंगु दु । ‘नेपालभाषा टाइम्स’ लिसे खँ ल्हासें आदिवासी जनजाति वकिलतय् संस्था लाहुर्निपया महासचिव शंकर लिम्बं न्हापा कायम जुइधुंकूगु नजिरयात कयाः धायेगु खःसा संसद पुनर्स्थापना जुइगु सम्भावना यक्व दुगु आशा प्वंकादीगु दु । तर आः सरकारया गतिविधि व न्यायालयया गतिविधि स्वयेगु खःसा थथे हे धाये फइगु अवस्था मदु ।

वय्कःया कथं थौंकन्हय् संवैधानिक इजलासया स्वरुप स्वयाः धायेगु खःसा सरकारया पक्षय् निर्णय वइगु सम्भावना अप्वः दु । तर देय् न्यंकं ब्वलनाच्वंगु आन्दोलन व न्हापा कायम जूगु नजिर कथं धाःसा संसद पुनर्स्थापना जुइगु सम्भावना अप्वः दु । वय्कलं धयादी कथं थ्व अनुमान जक खः उकिया निंतिं आः सर्वोच्च अदालतं मेगु बहस पीमाली ।