‘कोरोना भाइरस निक्वःगु विश्वयुद्ध लिपाया दकलय् तःधंगु हाथ्या’

येँ – संयुक्त राष्ट्र संघं विश्वन्यंक महामारी न्यनाच्वंगु कोरोना भाइरस (काेभिड-१९)यात निक्वःगु विश्वयुद्ध लिपाया हे दकलय् तःधंगु हाथ्या जूगु खँ धाःगु दु ।

राष्ट्र संघया महासचिव एन्टोनियो गुटेरेसं कोरोना भाइरसया दकलय् तःधंगु हाथ्या जूगु धयादीगु खः । वय्कलं कोरोना भाइरस नियन्त्रण यायेगु निंतिं फुक्कं देशय् अझ कडा व प्रभावकारी पलाः ल्ह्वनेमाःगु खँय् बः बियादिल ।

विश्वव्यापी रुपं स्वास्थ्य संकटया नापं मानव संकट नं वःगु धयादिसें महासचिव गुटेरेसं थुकीया विरुद्ध ल्वायेत फुक्कं देय्त राजनीतिपाखें पिने वयाः छथाय् हे च्वनेमाःगु धयादिल । वय्कलं विश्वं आः तक गवलें सामना मयागु कथंया आर्थिक मन्दीया सम्भावना दुगु ख्याच्वः नं बियादिल । वय्कलं कोरोनाया कारणं विश्वया अर्थतन्त्रयात तसकं तःधंगु धक्का लाइगु धयादिल ।

वंगु डिसेम्बरय् चीनया वुहानं शुरु जूगु कोरोना भाइरस आः विश्वन्यंक महामारीया रुप कायेधुंकूगु दु । अमेरिकाय् व युरोपियन देशय् सीपिनि ल्याः चीनय् स्वयां अप्व जूगु दु । मंगलवाः जक अमेरिकाय् ८००म्ह स्वयां अप्व मनूत सीगु खः । उखे युरोपय् नं मंगलवाः छन्हु हे सीपिनि ल्याः दकलय् अप्व जूगु खः ।

(ने. सं. ११४० चौलाथ्व ८/ वि. सं २०७६ चैत १९ बुधवाः)