मिसायात तेजाब छ्वाकूम्ह प्रहरी अधिकारीयात ज्यान मुद्दा

चितवन – मिसायात आइतवाः मिसायात तेजाबं छ्वाकूम्ह नायव निरीक्षक बिरुद्ध ज्यान मार्ने मुद्दा दर्ता जूगु दु । गोरखा छेँ जुयाः भरतपुर नगरपालिका ४ त्रिचोकय् बालं च्वनाच्वंम्ह कल्पना श्रेष्ठयात डेरा लिक्कसं दुवातय् हे तेजाब छ्वाकूम्ह दंगा नियन्त्रण गण हेटौंडाय् दरबन्दी जुयाः हाल अस्थायी ट्राफिक पोष्ट टाँडीइ ज्या यानाच्वंम्ह प्रहरी नायब निरीक्षक रामचन्द्र खनिया बिरुद्ध ज्यान मुद्दा दर्ता याःगु खः ।

श्रेष्ठया भाःत तार दल गण बाराय् ज्या सनाच्वंम्ह नेपाली सेनाया ३० दँया किसान श्रेष्ठं भरतपुर नगरपालिका १२ या ५१ दँ दुम्ह प्रहरी नायव निरीक्षक खनिया बिरुद्ध ज्यान मार्ने उद्योगय् मुद्दा दर्ता याःगु खः । जाहेरीइ ज्यान कायेगु हे नियतं तेजाब
छ्वाकूगु द्वपं बियातःगु दु । प्रहरी नायब उपरीक्षक प्रभुप्रसाद ढकालं खनियायात म्याद थप यानाः अनुसन्धान सुरु यानागु खँ कनादिल ।

तेजाब छ्वाके धुंकाः घाःपाः जूम्ह श्रेष्ठयात आः भरतपुर अस्पतालय् वासः याकातःगु दु । तथ्यांक कार्यालयं याःगु आर्थिक गणना गणकया रुपय् ज्या यानाच्वंम्ह नीच्यादँ दुम्ह श्रेष्ठया म्हय् आः न्हाय्पं, मिखा, छाती व तुतिइ तेजाबं घाः जुयाच्वंगु दु ।
अस्पतालय् वासः याकाच्वंम्ह श्रेष्ठं खनियां थःत न्हापांनिसें हे थथे यायेत स्वयाच्वंगु खँ धाःगु दु । न्हापा न्हापा लिउ लिउ जुइगु, टेलिफोन याइगु, ख्याइगु व वयां लिपा थः भाःत व थः जानाः खनियाया बिरुद्ध उजुरी तयागु वय्कलं कनादिल ।