नेपाःया भूभाग कब्जा विरोधय् हस्ताक्षर अभियान

येँ – नेपाःया भूभागयात भारतीय राजनीतिक नक्साय् दुथ्याकाः भारतं सार्वजनिक याःगु नक्साया विरोधय् हस्ताक्षर अभियान न्ह्याइगु जूगु दु । ‘राष्ट्रका लागि युवा’ नांया संस्थां उगु हस्ताक्षर संकलन ज्याझ्वः न्ह्याकूगु खः । थ्व अभियान देय्न्यंकं न्ह्याइगु खँ धाःगु दु । म्हिगः येँ छगू पत्रकार सम्मेलन यासें थःपिंसं न्हापा नं थीथी ज्याझ्वः याना वयाच्वनागु खँ धासें संकलन जुइगु हस्ताक्षर नेपाल सरकार व संयुक्त राष्ट्र संघय् छ्वयेगु खँ धाःगु दु ।

नेपाःया भूभाग न्ह्याथे यानाः नं लित हयेमाः धासें हस्ताक्षर अभियानय् सकलसितं ब्वति कायेत नं इनाप याःगु दु । थ्वहे झ्वलय् नेपाली कांग्रेसया सभापति शेरबहादुर देउवां कालापानी नेपाःया हे भूभाग जूगु खँ धासें तत्काल सरकारं वार्ता यायेमाःगु खँ धयादीगु दु ।

म्हिगः हेटौंडाय् पार्टीया नीति, अनुसन्धान तथा प्रशिक्षण प्रतिष्ठानं ग्वसाः ग्वःगु ज्याझ्वलय् न्ववायेगु झ्वलय् वय्कलं उगु खँ धयादीगु खः ।
भारतं नेपाःया भूमि अतिक्रमण याःसां नं नेपाःया राष्ट्रवादी नेता धयाच्वंम्ह प्रधानमन्त्री केपी शर्मा ओलीं छुं न्वमवाःगु धासें वार्ता पाखे थ्व समस्या ज्यंकेमाःगु खँ धयादीगु दु ।

 

सम्बन्धित बुखँ

LEAVE YOUR COMMENTS