कोष निर्देशकया योग्यता भ्वं माग

येँ (नेपालभाषा टाइम्स)- पशुपति क्षेत्र विकास कोषय् नकतिनि नियुक्त जूम्ह कार्यकारी निर्देशक लक्ष्मी पुनया नियुक्ति विवरण व योग्यता सम्बन्धी भ्वं प्रतिनिधिसभाया अन्तर्राष्ट्रिय सम्बन्ध तथा पर्यटन समितिं माग याःगु दु ।

समितिं पशुपति विकास कोषया गुरुयोजना फयांफछि याकनं पारित यानाः कार्यान्वयनय् यंकेत प्रधानमन्त्री तथा मन्त्रिपरिषदया कार्यालययात निर्देशन नं बिउगु दु । उकथं हे संस्कृति, पर्यटन तथा नागरिक उड्डयन मन्त्रालयया सचिव व पशुपति क्षेत्र विकास कोषया सदस्य सचिव व कोषाध्यक्षलिसे सहलह धुंकाः समितिं आनन्द होटललिसे जूगु सम्झौताया भ्वं उपलब्ध याकेत नं निर्देशन बिउगु दु ।

लिसें समितिं कोषया नामय् दुगु फुक्कं जग्गा फयांफछि यकीन व हालसाबिक यानाः कोषया नामय् लालपुर्जा कायेगु व्यवस्था यायेत नं निर्देशन बिउगु दु ।