तरकारी बजारय् हानं आन्दोलन

येँ (नेपालभाषा टाइम्स)- कालिमाटी तरकारी बजारया सटर हाकनं बालं बीगु सम्झौता खारेज यायेमाःगु माग यासें किसानतय्सं आन्दोलन याःगु दु । म्हिगः गुंगू किसान संघसंस्थाय् दुथ्याःगु राष्ट्रिय किसान सञ्जालं कालिमाटी तरकारी बजारय् प्रदर्शन याःगु खः ।

प्रदर्शनया झ्वलय् किसानतय्सं कृषिमन्त्री वेदुराम भुसालया राजीनामा फ्वँसें कालिमाटी व बालाजु तरकारी बजाःया बालं बीगु सम्झौता खारेज यायेत माग याःगु खः ।

प्रदर्शनया झ्वलय् प्रदर्शनकारी–तय्सं तरकारी बजाःया सटर व स्टल खुल्ला प्रतिस्पर्धाया आधारय् बालं बीमाःगु, प्रतिस्पर्धा मयासे बालं बीगु सम्झौता खारेज यायेमाःगु, ५० प्रतिशत सटर व स्टल उत्पादक किसानयात बीमाःगु, किसान व उपभोक्ता हित विरोधी निर्णय खारेज यायेमाःगु, बजार विकास समितिइ ५० प्रतिशत किसान प्रतिनिधि तयेगु व्यवस्था यायेमाःगु माग याःगु दु ।