नेपाल बैंकया एफपीओ भाः २८० तका प्रस्ताव

येँ – नेपाल बैंकं एफपिओया भाः छगू कित्ताया २८० तका क्वःछिउगु दु । कम्पनीया संचालक समितिया बैठकं शेयरया अंकित भाः सछिइ १८० तका थप यानाः एफपिओ पितबीगु क्वःछिउगु खः । नेपाल बैंकं १ करोड ७६ लाख ८४ हजार कित्ता एफपिओ पितबीत्यंगु दु ।

एफपीओ पिहां वयेवं नेपाल बैंकय् सरकारी स्वामित्व म्हो जुयाः ५१ प्रतिशत जक जुइगु जूगु दुसा सर्वसाधारणया स्वामित्व ४९ प्रतिशत थ्यनी । एफपीओ पिहां वयेवं कम्पनीया चुक्ता पुँजी नं ९ अर्ब ८१ करोड थ्यनी । नेपाल बैंकया शेयर भाः धाःसा थौंकन्हय् ३३६ तका जक थ्यनाच्वंगु दु । लगानीकर्तातय्सं ३३६ तका थ्यनाच्वंगु शेयरया एफपीओ भाः २८० तका थ्यंकूगु तसकं अप्वःगु खँ धयाच्वंगु दु ।

धितोपत्र बोर्डं प्रस्तावित भावय् हे निर्णय मजुइफुगु खँ धाःगु दु । बोर्डं धितोपत्र निष्काशन तथा बाँडफाँड निर्देशिका निर्देशन कथं भाः तोके याःगु खःकि मखु धयागु स्वयाः जक स्वीकृति बीगु खँ धाःगु दु । यदि भाः अप्वः तोके यानाहःगु जूसां म्हो यायेत धायेफुगु खँ धाःगु दु ।