आर्थिक तथ्यांक संकलन वैशाख १ निसें
येँ – केन्द्रीय तथ्यांक विभागं वइगु वैशाख १ गते निसें आर्थिक गणना याइगु जूगु दु । थुकिया निंतिं विभागं प्यद्वःम्ह जनशक्ति परिचालन याइगु जूगु दु । विभागं न्यासःम्ह सुपरभाइजर व स्वद्वः व न्यासःम्ह गणकत परिचालन यायेत्यंगु खः । थुकिया निंतिं आवश्यक तालिम बिइधुंकूगु खँ विभागं धाःगु दु ।
संघ, प्रदेश व स्थानी तहया व्यवासायिक प्रतिस्थान लिसें सामान्य व्यवसायीतय् तकं वित्तीय अवस्था व व्यावसायिक यथार्थताया तथ्यांक मुंकेगु ज्या यायेत्यंगु खः । तथ्यांक मुंकेगु ज्या जेठ मसान्त तक जुइ ।गणकतय्सं देय्न्यंकं मुंकूगु आर्थिक विवरण प्रशोधन यानाः विश्लेषणत्मक प्रतिवेदन तयार यायेत धाःसा न्यादँ बीगु अनुमान यानातःगु दु ।
तथ्यांकय् व्यावसायिक प्रतिष्ठानया कूल ल्याः, प्रतिस्ठानया वैधानिक स्थिति, वैदेशिक पूँजीया लगानी, कूल स्थिर सम्पत्तिइ जूगु लगानी, प्रतिष्ठानया घनत्वय, लिंग कथं रोजगारीया स्थिति, प्रतिष्ठानया पहुँच लगायतया तथ्यांक कायेगु ज्या जुइ ।
हरेक जिल्लाय् प्रमुख जिल्ला अधिकारीया अध्यक्षताय् जिल्ला आर्थिक गणना समन्वय समिति गठन यायेधुंकूगु दु ।
विभागया महानिर्देशक सुमनराज अर्यालं देय्न्यंकं न्हापांखुसी जुइत्यंगु आर्थिक गणना पाखें वःगु सुचंया आधारय् समग्र आर्थिक क्रियाकलापया स्थिति मूल्यांकन यायेगु खँ कनादिसें थुकिया आधारय् सरकारं देय्यात समृद्ध दयेकेत आवश्यक नीति निर्माण यायेफइगु खँ धयादिल ।
LEAVE YOUR COMMENTS