सिमेन्टय् विदेशी लगानी दिकेत माग

येँ – नेपाःया सिमेन्ट उद्यमीतय्सं सिमेन्टय् विदेशी लगानी दिकेत माग याःगु दु । नेपाली उद्यमीपिंसं शुक्रवाः उद्योगमन्त्री मातृका यादवलिसे सहलहया झ्वलय् सिमेन्टय् विदेशी लगानी तुरुन्त दिकेमाःगु माग याःगु खः । नेपाल सिमेन्ट उत्पादक संघं थ्व सहलह ज्याझ्वः याःगु खः ।
नेपाली उद्यमीतय्सं नेपालय् आः माग स्वयां अप्वः सिमेन्ट उत्पादन जुइधुंकूगुलिं विदेशी लगानी दिकेमाःगु खँ धयाच्वंगु दु ।

माग स्वयां अप्वः उत्पादन जुइवं सिमेन्टय् अस्वस्थ प्रतिस्पर्धा सुरु जूगु खँ उद्यमीतय्सं धयाच्वंगु दु । थथे अस्वस्थ प्रतिस्पर्धा यानाः उद्यमीतय्सं बजारं ध्यबा तकं उठे यायेमफयाच्वंगु दु ।संघया अध्यक्ष धु्रव थापां नेपालय् थौंकन्हय् दँय् १ करोड टन सिमेन्टया माग दु, तर आः दुगु उद्योगं जक हे १ करोड ५०लाख टन सिमेन्ट उत्पादन यायेफयेधुंकूगु खँ धयादीगु दु ।

‘माग स्वयां अप्वः उत्पादन जुइवं सिमेन्टय् अस्वस्थ प्रतिस्पर्धा सुरु जुल’

होङ्सी शिवम सिमेन्टय् चीनया तःधंगु लगानी दुहां वयेवं स्वदेशी उद्यमीतय्सं विदेशी लगानी आवश्यक मजूगु खँ धयाहःगु खः । थौंकन्हय् नेपालय् ६० गू सिमेन्ट उद्योग दुसा अझ मेगु उद्योग तःधंगु लगानीइ चायेकेत्यंगु दु । थुकी मध्ये धादिङ्गय् दयेकाच्वंगु चिनिया लगानीया हे हुवासिन सिमेन्ट उद्योग नं खः ।

थ्व उद्योगं सिमेन्ट उद्योग चायेकेगु निंतिं पूर्वाधार दयेकेगु ज्या यानाच्वंगु दु । नेपालय् क्लिंकर सहितया सिमेन्ट उद्योगय् लगानी अप्वयेवं भारतपाखें आयात धाःसा म्हो जुया वंगु दु । होङ्सी, अर्घाखाची, आरएमसी थेंज्याःगु झिगुलिं मलयाक उद्योगतय्सं क्लिंकर उत्पादन सुरु यायेवं भारतपाखें आयात म्हो जुयावंगु खः ।

सिमेन्ट उद्योग अप्वया वंलिसें सिमेन्टया गुणस्तर नं बांमलाना वंगु खँ धाःगु दु । अस्वस्थ प्रतिस्पर्धाया कारणं लबः म्हो जुया वंलिसें उद्योगतय्सं गुणस्तरहीन सिमेन्ट उत्पादन याना वयाच्वंगु दु । नेपाल गुणस्तर तथा नापतौल विभागं छुं न्हि न्ह्यव जक गुणस्तरहीन सिमेन्ट बजारय् हःगु प्यंगू सिमेन्ट उद्योगतय्त कारवाही नं याःगु खः ।

विभागया महानिर्देशक विश्वबाबु पुडासैनीं माग स्वयां आपूर्ति अप्वया लबः म्हो जुयावंगुलिं गुणस्तर हे म्हो जुइक उत्पादन सुरु जूगु शंका यानादीगुदु । सिमेन्ट उद्योगीतय्सं भारतया सीमा लागाय् सिमेन्टया निकासी सम्भावना दुगुलिं छुं सहुलियत बीत नं माग यानाच्वंगु दु ।

उमिसं कर, बिजुली व कोइलाय् सहुलियतता बीत माग याना च्वंगु खः । भारतीय सिमेन्ट स्वयां नेपाली सिमेन्टया भाः छगू बोराय् हे सछि तका अप्वया च्वंगुलिं उद्योगीतय्सं सहुलियतया माग यानाच्वंगु दु ।

सम्बन्धित बुखँ

LEAVE YOUR COMMENTS