अनुमगन पुचः वःगु सीवं व्यापारीत पसः तिनाः भागाभाग

येँ (नेपालभाषा टाइम्स) – येँ महानगरपालिकां याना वयाच्वंगु नियमित अनुगमनया झ्वलय् अनुगमन पुचः वःगु सीवं व्यापारी भागाभाग जूगु दु। येँ मनपाया उपभोक्ता समितिया अनुगमन पुचः कालिमाति तरकारि तथा फलफुल बजारय् अनुगमन यायेत वंगु इलय् व्यापारीतय् भागाभाग जूगु खः ।

तरकारि बजाः दुने संचालन जुयाच्वंगु न्या पसःया व्यापारीतय्सं अनुगमन पुचःयात खरिद विक्रीया बिल क्यने मफयेवं व्यापारीत पसः हे त्वःताः बिसिउँ वंगु खः । उगु इलय् बजाः दुने संचालन जुयाच्वंगु निगू दर्जन स्वयां अप्वः न्या पसःमध्ये झिंन्यागू पसःया व्यापारीत पसःया सटर बछि जक साला भागाभाग जूगु खः ।

बजारय् च्वंगु न्या पसःमध्ये अप्वःथें पसलं गुणस्तर स्वयां नं खरिद विक्रीया बिल क्यने मफुगुलिं हे बिसिउं वंगु अनुगमन पुचलं धाःगु दु। पुचलं अनुगमन याःगु आपालं पसःमध्ये दर्ता, नवीकरण व बिलय् समस्या खने दुगु महानगरपालिकाया पशु सेवा विभागया अधिकृत डम्बरबहादुर बमं कनादिल ।

अनुगमन पुचलं पसःया सटर साला च्वँच्वं हे सप्तरी माछा पसलया थुवाःयात नियन्त्रणय् कयाः पसलय् स्वःगु इलय् ९ किलो बराबरया ध्वगिगु न्या जफत याःगु खः । थःगु पसलय् च्वंगु न्या जफत यायेवं पसः थुवालं च्वापु क्वफाये ल्वःमंगु व न्या नं अपाय्सकं नये मजिउ मजूनिगु प्रतिक्रिया बिउगु खः । अनुगमन पुचलं बिल जारी मजुइगु धइगु हे मूल्य व गुणस्तरय् उपभोक्तायात ठगे यायेगु ज्या खः धाःगु दु ।

पसः त्वःताः हे बिसिउँ वंपिं व्यापारीतय्त समितिपाखें आवश्यक भ्वंसहित सम्बन्धित ज्याकुथिइ उपस्थित जुइत धाःगु दु। पसः त्वःताः बिसिउँ वनेगु झ्वलय् गुलिसिनं न्या त्वःताः, गुलिं बछि जक सटर सालाःव गुलिं तालं हे मग्वसे बिसिउँ वंगु खः ।