राष्ट्रिय ललितकला ब्वज्याय् कलाकार सम्मान

येँ – च्याक्वःगु राष्ट्रिय ललितकला ब्वज्या–२०७५ म्हिगःनिसें नेपाल कला परिषद्य् शुरु जूगु दु । थ्व हे बैशाख २० गतेतक जुइगु ललितकला ब्वज्याय् थीथी न्हय्गू विधाय् प्यसः व छम्ह कलाकारया कलाकृति तयातःगु दु । नेपाल ललितकाल प्रज्ञा–प्रतिष्ठानया ग्वसालय् जूगु उगु ब्वज्याया उलेज्या यासें संस्कृति, पर्यटन व नागरिक उड्डयन मन्त्री रवीन्द्र अधिकारी वरिष्ठ मूर्तिकार कालु कुम्हाः व विजय थापायात अरनिको राष्ट्रिय कला प्रज्ञा सम्मान लःल्हानादिल ।

उगु सम्मान म्हतिं छगू लाख तका व सम्मान पत्रया खः । अथे हे मन्त्री अधिकारीं प्रदेश नं १ या रुपक राई, प्रदेश २ या सुदीमा कर्ण, प्रदेश नं ३ या सुरेन्द्र शिल्पकार, प्रदेश ४ या गोपाल बराई, प्रदेश नं. ६ या लक्ष्मण श्रेष्ठ व कर्णाली प्रदेशया कृष्णप्रसाद शाहयात विशेष पुरस्कार लःल्हानादिल ।

अथे हे ललितकला लेखन पुरस्कार डा. रामदयाल राकेशयात संचारमाध्यम पुरस्कार विनिता मरहठ्ठायात लःल्हायेगुया नापनापं ब्वज्याय् सहभागि नीस्वम्ह कलाकारयात नं पुरस्कृत याःगु खः । ज्याझ्वलय् मन्त्री अधिकारी, प्रतिष्ठानया कुलपति रागिनी उपाध्याय, उपकुलपति शारदा चित्रकार लगायतं नेपाःया कला, संस्कृति व चित्रयात विश्वया मान चित्रय् स्थापित यायेत प्रतिष्ठानं यानाच्वंगु ज्याया लिसें यायेमाःगु ज्यायात कयाः नुगःखँ तयादीगु खः ।