थौं नेपाःया भाग्यया फैसला

येँ-  माल्दिभ्सया मालेय् जुयाच्वंगु साफ च्याम्पियन्सीपया बुधवाः जुइगु कासां च्याम्पियन्सीपया फाइनलय् थ्यनीगु देय्त क्वःछिउगु जुइ । थौं कासा जुइगु अवस्थाय् तक थ्व धेंधेंबल्लाः तसकं रोचक मोडय् थ्यनाच्वंगु दु । बुधवाः नेपाली ई कथं पौन पाँच बजे नेपालं बंगलादेश लिसे व भारतं माल्दिभ्स लिसे धेंधेंबल्लाः याइ । अले बुधवाः धेंधेंबल्लाः याइगु थ्व प्यंगुलिं देय् फाइनलय् वनीगु सम्भावना दुगु देय् जुयाच्वंगु दु ।

साफ च्याम्पियनशीपय् मुक्कं न्यागू देशं ब्वति काःगुलिं राउन्ड रोविनया आधारय् धेंधेंबल्लाः जुयाच्वंगु खःसा थुकी श्रीलंका आःतक मुक्कं १ अंक जक कयाः धेंधेंबल्लाखं पिने लायेधुंकूगु दु । थ्वयां न्ह्यः म्हितूगु आधारय् माल्दिभ्स व नेपालया ६–६ अंक दुसा माल्दिभ्स गोलअन्तरया ल्याखं शीर्ष थासय् दु । अथेहे भारतयाके ५ अंक व बंगलादेशयाके ४ अंक दु ।

बंगलादेशविरुद्ध नेपालं बराबरी जक याःसां नेपाः फाइनलय् थ्यनीगु जुइसा बंगलादेश धाःसा धेंधेंबल्लाखं पिने लाःवनी । अथेहे माल्दिभ्सं नं भारतयात बराबरीइ जक पने फःसां फाइनलय् थ्यनीगु जुइसा भारत धेंधेंबल्लाखं पिने लाःवनीगु जुइ ।

बुधवाःया कासाय् भारत व बंगलादेशयात फाइनल तक थ्यंकेगु निंतिं कासा त्याके हे माःगु अवस्था दुसा नेपाः व माल्दिभ्सयात बराबरी याःसां गाः । तर नेपाः बंगलादेशपाखें व माल्दिभ्स भारतपाखें पराजित जुल आः शीर्ष थासय् लानाच्वंगु थ्व निगुलिं देय् धेंधेंबल्लाखं पिने लाइगु जुइ ।

भारत न्हय्क्वःतक साफ च्याम्पियनशीप त्याकेधुंकूगु देय् खःसा नेपाः आःतक फाइनल तक नं थ्यंगु मदुनि । आइतवाः जूगु कासाय् नेपालं भारतयात बराबरीइ जक पनेफुगु खःसां तप्यंक फाइनलय् थ्यनीगु खः, तर ८२ मिनेट तक भारतयात पनेत ताःलाःगु नेपाः १–० गोलं बुइवं फाइनलय् वनेगु निंतिं अझ पीमाःगु अवस्था ब्वलंगु खः । कासाया ८२ औं मिनेटय् सुनिल क्षेत्रीं याःगु छगू गोलं नेपाः पराजित जूगु खः । साफय् नेपालं भारतविरुद्ध जूगु कासाय् आःतक छक्वः जक त्याकूगु दुसा भारतं खुक्वः त्याकूगु दु ।

सम्बन्धित बुखँ

LEAVE YOUR COMMENTS