तोडफोड याःम्ह एनआरएनयात न्यय्द्वः जरिवाना

येँ – थःके विदेशया नागरिकता छगू दयेसातकि नेपाःमितय्त मनू हे गने मयाइम्ह छम्ह एनआरएनयात थनया त्रिभुवन अन्तर्राष्ट्रिय विमानस्थलं ५० द्वः तका दां जरिवाना पुइकाः त्वःतूगु दु ।विमानस्थलय् कर्मचारीयात लाक्व–पाक्व ब्वः बियाः तोडफोड समेत याःम्ह अष्ट्रेलियन नेपाःमि रमेश थापायात वंगु शनिवाः अध्यागमन विभागं ज्वंगु खः ।

ज्वनाः हिरासतय् तयातःम्ह थापायात गैर आवासीय नेपाली संघया पहलय् जरिवाना पुलाः जूसां त्वःतकेगु ज्या जूगु खः । थापाया लिसें उषाकिरण वरिया नांम्ह छम्ह मिसायात नं विभागं २५ द्वः तका जरिवाना पुइकूगु दु । थापां विभागय् तोडफोड यानाच्वंगु इलय् वरियां वयात अथे यायेत उक्से यानाच्वंगु द्वपं विभागं बिउगु दु ।

तर वरिया थः हे तोडफोड यायेगु ज्याय् संलग्न मजूगुलिं वयात ज्वनेगु ज्या धाःसा मयाःगु खः । अष्ट्रेलियां नेपाः वःम्ह थापां विमानस्थलय् ताःहाकः लाइनय् च्वने माल धकाः तं पिकयाः विभागया डेस्कय् वनाः कर्मचारीयात ब्वः बीगु लिसें टेबुल तोडफोडया ज्या याःगु खः । उगु इलय् मेपिं न्याम्ह नं कर्मचारीलिसे हाः वःगु खःसां सीसीटिभी फुटेजय् थापा छम्हेस्यां जक तोडफोड याःगु खने दुगुलिं वयात जक ज्वंगु खँ धाःगु दु ।

थ्व स्वयां छुं न्हि न्ह्यः सिल्क एअरया विमानपाखें येँनं सिंगापुर वंम्ह एनआरएन संघया वर्तमान अध्यक्ष भवन भट्ट व सनत न्यौपानेयात अय्लाः त्वनाः विमान दुने होहल्ला यात धासें क्रु मेम्बरतय्सं जहाजं पितिना हःगु खः ।एनआरएन संघया गुक्वःगु अधि–वेशनया झ्वलय् थुगुसी न्हूम्ह अध्यक्ष ल्ययेगु ज्या नं जुयाच्वंगु दु ।