रुस व बेलारुसया लँ जुयाः युक्रेन त्वःतकेबीगु प्रस्ताव युक्रेनपाखें अस्वीकार

एजेन्सी- रुसं युक्रेन त्वःता वनीपिनिगुनिंतिं बेलारुस व रुस जुयाः वनेगु लँ चायेकेगु धकाः तःगु प्रस्तावयात युक्रेनं अस्वीकार याःगु दु । युक्रेनं रुसया थ्व प्रस्ताव पूर्वक अनैतिक जूगु खँ धाःगु दु । युक्रेनया राष्ट्रपति भोलोदिमिर जेलेन्स्कीया छम्ह प्रवक्तां रोयटर्स समाचार संस्था लिसे खँ ल्हासें जनताया पीडायात टेलिभिजनय् क्यनेगु तस्बिर कथं छ्यली, थ्व तसकं अनैतिक ज्या खः धाःगु दु ।

वय्कलं थःगु लिखित सन्देशय् युक्रेनी नागरिकतय्के थःगु हे देय्या लँपु जुयाः थःगु भूमि त्वःतेगु अधिकार दयेमाः धयादीगु दु ।

रुसं थःपिंसं आक्रमण यानाच्वनागु थाय् किएभ, खार्किभ, मोरिउपोल व सुमी शहरं पिहां वनीपिंत रुस व बेलारुसया लँपु जुयाः छ्वयेगु प्रस्ताव तःगु खः ।

थ्व हे दथुइ अन्तर्राष्ट्रिय रेडक्रस (आइसीआरसी)या निर्देशक डोमिनिक स्टिलहार्टं बिबिसी रेडियो फोर लिसे खँ ल्हासें युक्रेनया मारिऊपोलं मनूत पिहां वनेगु निंतिं छ्यलेगु धयागु सहमति जूगु करिडोरय् विस्फोटक पदार्थ तयातःगु थःपिंत जानकारी वःगु खँ धयादीगु दु ।

मनूत सुरक्षित पिहां वनेगु निंतिं ‘मानवीय करिडोर’ संचालनय् मवःगु कारण न्यंगु इलय् वय्कलं थःपिंसं छुं न्हि न्ह्यवनिसें रुस व युक्रेन निगुलिं पक्ष लिसे सहलह यानाच्वनागु, तर युद्धविराम सम्झौता बारेया विवरण पुष्टि याये ल्यंदनिगुलिं देय् त्वःतीपिं युक्रेनीतय्त सहरं पिहावयेत स्वीकृति बीत समस्या जुयाच्वंगु खँ कनादीगु खः ।

सम्बन्धित बुखँ

LEAVE YOUR COMMENTS