पुखूया पःखाः निर्माणया सार्वजनिक परीक्षण ज्याझ्वः

ख्वप (नेपालभाषा टाइम्स) ख्वप नगरपालिका वडा नं. ६ स्थित भोलाछेँ त्वालय् च्वंगु पुखूया पःखाः दनेगु निंतिं सार्वजनिक परीक्षण ज्याझ्वः याःगु दु । भोलाछेँस्थित वडा ज्याकू न्ह्यःनेसं च्वंगु भोलाछेँ पुखूया पःखाः निर्माण ज्याया सार्वजनिक परीक्षण ज्याझ्वः वंगु शनिवाः याःगु खः ।

उगु इलय् ख्वप नगरपालिकाया प्रमुख सुनिल प्रजापतिं भोलाछेँ पुखू स्वयेबह जूगु छगु पुखू जूगु खँ कनादिल । नेपाल मजदुर किसान पार्टीया योगदानया हे कारणं थौं ख्वप देय्या जनताया जीवनस्तर थहां वंगु चर्चा यानादिसें वय्कलं देय्न्यंकंया स्थानीय तहं ख्वप नगरपालिकां शिक्षा, स्वास्थ्य, सम्पदा पुनःनिर्माण लगायतया विकास निर्माणय् यानाच्वंगु ज्यायात च्वछायेगु नापं उकिया अनुशरण यायेत स्वयाच्वंगु दु धयादिल ।

ख्वप नगरपालिकां थःगु ज्या व गतिविधि पारदर्शी धंगं थीथी संचारमाध्यम व प्रकाशनपाखें सार्वजनिक याना वयाच्वंगु धासें शिक्षा व स्वास्थ्यया सन्तुलित विकास ख्वपवासीया जनताया जीवनस्तरय् उल्लेख्य रुपं प्रगति जूगु दु धयादिल ।

ख्वप नगरपालिका ६ वडाअध्यक्ष हरिराम सुवालं पुखूया जिर्णोद्वार व मर्मतया निंतिं उपभोक्ता समितिइ च्वनाः ज्या यानादीपिंत सुभाय् देछासे वडा दुने जुयाच्वंगु विकास निर्माणलिसें मेमेगु भौतिक संरचना व गतिविधिया बारे जानकारी बियादीगु खः ।

उपभोक्ता समितिया अध्यक्ष कृष्णभक्त चाँगुभारीया सभापतित्वय् वय्कलं हे लसकुस यानादीगु ज्याझ्वलय् कोषाध्यक्ष सुरज बजिकों आय व्यय विवरण न्ह्यब्वयादीगु खः । ज्याझ्वलय् ख्वप नगरपालिका कार्यपलिकाया दुजः रोशनमैयाँ सुवाल, ६ वडा सदस्य गोविन्द दुवाल, उपभोक्ता समितिया सचिव सानुमैया बजिको, गोपिकृष्ण चाँगुभारीं नं थःथःगु नुगःखँ तयादीगु खः ।