ने. सं. ११४४ कौलाथ्व पारू - नःलास्वनेगु

अमेरिकी बैंक ताथ जुइवं लुँया भाः थहां वन

येँ (नेपालभाषा टाइम्स)- अमेरिकाया स्वंगूगु तःधंगु रिपब्लिक बैंक ताथ जुइवं उकिया लिच्वः लुँया भावय् लाःगु दु । म्हिगः अन्तर्राष्ट्रिय लुँया बजारय् लुँ प्रति औंश २०४४ डलर थ्यंगु दु । बैंक ताथ जुइवं लगानीकर्तातय्सं लुँइ लगानी शुरु याःगु खःसा उकिया लिच्वः कथं लुँया भाः थहां वंगु खँ नेपाल सुनचाँदी व्यवसायी महासंघया पुलांम्ह अध्यक्ष लिसें बजार विश्लेषक तेजरत्न शाक्यं ‘नेपालभाषा टाइम्स’ यात कनादीगु दु ।

वय्कःया कथं रिपब्लिक बैंक ताथ जुइवं म्हीग १९८२ निसें १९८४ डलर प्रतिऔंश कायम जुयाच्वंगु लुँ छक्वलं थहां वनाः २०१८ डलर थ्यंगु खःसा म्हिगः हाकनं थहां वनाः २०४४ डलर कायम जूगु खः ।

म्हिगः नेपालय् लुँ तोलां १२०० तका थहां वनाः न्हूगु रेकर्ड कायम जूगु दु । म्हिगः लुँ तोलां १ लाख ११ हजार ८०० तका थ्यंगु खः । थ्व स्वयां न्ह्यः वंगु चैत २२ गते लुँ तोलां १ लाख ११ हजार थ्यनाः न्हूगु रेकर्ड कायम जूगु खःसा वयां लिपा लुँया भाः कुहां वयाच्वंगु खः ।

बजार विश्लेषक शाक्यया कथं लुँया भाः अझ नं थहां वनाः न्हूगु रेकर्ड कायम जुइगु सम्भावना दु । वय्कःया कथं अन्तर्राष्ट्रिय लुँया बजारय् लुँ प्रति औंश २१०० डलर तक थ्यनीगु सम्भावना दु । यदि २१०० डलर थ्यन धाःसा नेपालय् लुँ तोलां १ लाख १५ हजार थ्यनी ।

थ्वहे झ्वलय् अमेरिकाया फेडरल रिजर्भ बैंकं ब्याज दर थकायेगु धकाः धाःसां नं बैंकया अध्यक्ष जेरोम पावेलं तत्काल बैंकया ब्याज दर थकायेगु आवश्यक मजू धासें ब्याज दर थमकाःगु खः । फेडरल रिजर्भ बैंकं ब्याज दर थकयाः ५.२५ प्रतिशत थ्यंकेगु धकाः धाःगु खःसां पावेलं ब्याज दर थकायेगु आवश्यकता मदु धासें बैंकया ब्याज दर ४.७५ हे कायम याःगु खः । थ्व स्वयां न्ह्यः फेडरल रिजर्भ बैंकया ब्याज दर २ प्रतिशत कायम जुयाच्वंगु खः ।