छवाः लिपा युनियन हाइड्रोपावरया शेयर

येँ – युनियन हाइड्रोपावरं वइगु चैत्र १३ गते निसें प्राथमिक शेयर पितबीत्यंगु दु । युनियनं प्रभावित क्षेत्रय् विक्री मजूगु शेयर न्हापं यानाः ३५ करोड ३४ लाख ३४ हजार तका बराबरया प्राथमिक शेयर पितबीत्यगु खः । थुकी मध्ये २ प्रतिशत बराबरया ७० हजार ६६८ कित्ता कर्मचारीतय् निंतिं छुटे यानातःगु दुसा ल्यं दुगु ३४ लाख ६३ हजार ६५४ कित्ता शेयर सर्वसाधारणयात मीगु जुइ ।

मेखे सामुहिक लगानी कोष (म्युचुअल फण्डं) थ्व कम्पनीया शेयर धाःसा छगू कित्ता नं मन्यात । नेपाल धितोपत्र बोर्डं छुं नं शेयर पितबीबलय् म्युचुअल फण्डयात ५ प्रतिशत शेयर मीमाःगु नियम दयेकातःगु खःसां फण्डं धाःसा थुकिया छगू कित्ता शेयर नं मन्याःगु खः । फण्डं छुं नं कम्पनीया थथे छगू कित्ता हे शेयर मन्याःगु थ्वहे न्हापांखुसी खः ।

थ्व कम्पनीं दयेकाच्वंगु आयोजनाया लागत तुलनात्मक रुपं अप्वःगुलिं याकनं प्रतिफल मवइगु कारणं फण्डं शेयर मन्याःगु खँ धाःगु दु । कम्पनीं दयेकूगु ३ मेगावाट क्षमताया आयोजनां २०७४ माघं निसें उत्पादन सुरु यायेधुंकूगु दु । तर थ्व आयोजनाया लागत प्रति मेगावाट २६ करोड ५० लाख तूगुलिं थुकिया लगानी लिहां वयेत थ्यंमथ्यं झिछदँ तुइगु अनुमान दु ।

थुकिया कारणं सर्वसाधारण नं थ्व आयोजनाय् शेयरय् उलि आकर्षित मजुइफुगु खँ धाःगु दु ।आयोजनाया लागत ७९ करोड ५० लाख दुगु खःसा कम्पनीं शेयर पाखें हे जक ७५ करोड तका उठे यायेगु योजना दयेकातःगु दु ।

यक्व शेयर पुँजी दुगु कम्पनीया प्रति शेयर आम्दानी तसकं हे म्हो जुइ । अथे जूगुलिं लगानी लिहां वयेत यक्व ई काइगु खः । कम्पनीया त्यासा धाःसा यक्व मदुगुलिं आकिवं निसें हे लाभंस बीफइगु खनेदुसां थ्व तसकं म्हो जुइगु जुइगु विश्लेषकतय्सं धाःगु दु ।

सम्बन्धित बुखँ

LEAVE YOUR COMMENTS