बेलायती संसद्य् भ्रमण दँया प्रचार
येँ – नेपाल भ्रमण दँ २०२० या प्रचार प्रसारया झ्वलय् बेलायती संसदय् थ्यंक वनाः अभियान न्ह्याकीगु जूगु दु । बेलायतया हाउस अफ लर्डस (च्वय्या सदन)य् भ्रमण दँ बारे प्रचार प्रसार जुइगु खँ भ्रमण दँया सचिवालयं धाःगु दु । थुकिया निंतिं नेपालं संस्कृति पर्यटन व नागरिक उड्डयन मन्त्री योगेश भट्टराईया नेतृत्वय् छगू पुचः बेलायत थ्यने धुंकूगु दु ।
दँय्दसं जुइगु वल्र्ड ट्राभल मार्केट (डब्लुटिएम)या झ्वलय् बेलायतय् वइगु कात्तिक २१ गते नेपाल भ्रमण वर्ष प्रवद्र्धनया निंतिं विशेष ज्याझ्वः तयागु खँ सचिवालयं धाःगु दु । विश्वया तःधंगु ट्राभल सो कथं कयातःगु थ्व ब्वज्याय् सोमवाः निसें सुरु जूगु खः । स्वन्हुयंकं जुइगु थ्व ब्वज्याय् नेपाःया समग्र पर्यटन प्रवद्र्धनया निंतिं हलंज्वलं, नसाज्वलंया परिकार नं ब्वयागु खँ नेपाल पर्यटन बोर्डं धाःगु दु ।
कार्यक्रमया मू आकर्षण नेपाःया पर्यटन विकास तथा प्रवद्र्धनय् योगदान याना वयाच्वंम्ह बेलायती नागरिकतय्त ‘दि हिमालयन ट्राभल अवार्ड २०१९’ पाखें सम्मान यायेगु ज्याझ्वः जुइगु खँ धाःगु दु ।
ट्राभल एजेन्ट तथा होटल व्यवसायी अरोरा, नेपाःया पर्यटनय् नीन्यादँ न्ह्यवनिसें लगे जुयाच्वनादीम्ह मर्कस कट्टन, नेपाःया वन्यजन्तु पर्यटनय् ज्या याना वयाच्वनादीम्ह एभी जीम एडवार्ड, नेपाःया पर्यटकीय गन्तव्यया प्रचार प्रसारय् ताःई न्ह्यव निसें लगे जुयाच्वनादीम्ह रोबिन मार्सटन व नेपाःया पर्यटनया अग्रणी कोलोनेल जोमयात दि हिमालयन अवार्ड लःल्हायेत्यंगु खः ।
बेलायतया चर्चित अभिनेत्री, च्वमि व अभियानकर्मी जोआन्न लुम्ले, भारतीय मूलया बेलायतीराजनूतिज्ञ सन्दिप कुमार बर्मा व भारतीय मूलया हे बेलायत धनाढ्य व्यापारी गोपीचन्द परमानन्द हिन्दूजायात नेपाल भ्रमण दँ २०२० अभियानया सद्भावन दूत नियुक्त यायेगु ज्याझ्वः नं दु ।
अथेहे ताःई न्ह्यव निसें नेपालय् पर्यटक छ्वया वयाच्वंगु प्रमुख बेलायती टुर अपरेटपिंत नं कदरत्र लःल्हाइगु ज्याझ्वः दु । नेपाःया पर्यटन प्रवद्र्धनय् ग्वाहालि याना वयाच्वनादीपिं माइकल वेट, आस्एले टफ, पटेर बुर्रेल, रोबर्ट गुडवीन, जेरल्डिन स्टिन्सन, आन्डे स्वार्रेल व स्टेभ बेरीयात प्रसंशापत्र लःल्हाइगु खँ भ्रमण दँ सचिवालयं धाःगु दु ।
LEAVE YOUR COMMENTS