गल्छी–रसुवागढी सतक निर्माण तीव्र, थनिंनिसें खुघौ लँ बन्द

नुवाकोट – राष्ट्रिय गौरवया आयोजनाया रुपय् विस्तार जुयाच्वंगु बहुचर्चित ‘गल्छी–त्रिशुली– मैलुङग–स्याफ्रुबेसी–रसुवागढी’ सतक दयेकेगु ज्याः इलय् हे क्वचायेकेगु निंतिं तीव्रगतिं ज्या न्ह्यानाच्वंगु दु । थांैकन्हय् निगू चरणय् न्हि च्याघौ लँ बन्द यानाः दयेके ज्या न्ह्याकाच्वंगु खःसा थौं फागुन १ गते निसेंं छगू हे चरणय् न्हि खुघौ सतक बन्द य ानाः ज्या न्ह्याकेगु खँ योजना प्रमुख सुवोध देवकोटां धयादीगु दु ।फागुन १ गतेनिसें सुथय् ११ बजे निसें ५ बजे तक सतक बन्द यानाः ज्या यायेगु निर्णय जिल्लाया सर्वदलीय व सर्वपक्षीय बैठकं याःगु खः ।

वि.सं. २०७३ कात्तिक २२ गते मन्त्रिपरिषद्या निर्णय कथं पुस १ गते निसें सतक स्तरोन्नति व विस्तार ज्या सुरु जूगु खः । क्वःछिनातःगु ई स्वयां थप खुला तयाः २७ महिना दुने (२०७५ फागुन ५) गते दुने ज्या क्वचायेकेमाःगु सम्झौता दु । थ्व स्वयां न्ह्यव दछिया प्रगति तसकं निराशजनक जूगुलिं लक्ष्य चूलाकेत युद्धस्तरं ज्या जुयाच्वंगु खँ प्रमुख देवकोटां धयादीगु दु ।भारतीय नाकाबन्दीं चीनलिसे स्वाइग्ु अन्तर्राष्ट्रिय नाकाया रुपय् छनोट याःगु खःसा सतक विस्तार लक्ष्य अनुसार उपलब्धि यायेफयाच्वंगु मदु’ योजना प्रमुख देवकोटां धयादिल, ‘मुआब्जा निर्धारण, विद्युतीय थां चिइकेगु, वन क्षेत्रय् ज्या यायेगु अनुमति कायेत लिबाःगुलिं इलय् हे ज्या पूवंकेत थाकुयाच्वंगु खः ।

ज्या सुरु जूगु दछिया अवधि (वि.सं. २०७४ मंसिर मसान्त)इ आर्थिक प्रगति १० प्रतिशत जक जूगु खः । वंगु पुस १ गते निसें लँ बन्द यानाः ज्या सुरु यायेवं निलाया दुने हे न्ह्यथनेबहः कथं ज्या जूगु खः । योजना प्रमुख देवकोटाया कथं आर्थिकपाखे २१.३ प्रतिशत व प्राविधिकपाखे १४.३५ प्रतिशत ज्या पूवंगु दु । पृथ्वी राजमार्गय् लाःगु धादिङया गल्छिपाखें नुवाकोटया देवीघाट–त्रिशुली रसुवाया मैलुङ–स्याफ्रुबेसी–रसुवाढी जुयाः चीनया केरुङ दुहां वनेगु थासय् तकया सतक ८२ किलोमिटर दु ।
सतक दयेकेगु निंतिं ठेकेदार कम्पनी पाखें जुयाच्वंगु ४६ किलोमिटर (गल्छी–त्रिशुली–मैलुङ)या ज्या सम्झौता यानाः ज्या सुरु जूगुया दछिया दुने १० प्रतिशत जक जूगु दु । आः ९० प्रतिशत ज्या याये ल्यंदनि ।

फागुन १ गते निसें ६ घण्टा लँ बन्द यानाः ज्या यायेबलय् निलाया दुने ३५ प्रतिशत ज्या पूवंके लक्ष्य दुगु खँ योजना प्रमुख देवकोटां धयादीगु दु ।गल्छी निसे चीनया सीमा रसुवागढी तकया ८६ किमि लँ दयेकेगु निंतिं सरकारं स्वंगू खण्डय निर्माण यायेत गुंगू अर्ब ५० करोड बजेट बिउगु खः । सडक सुधार व स्तरोन्नतिया ज्या ठेकेदार पाखें कोभेक–टुण्डी–रसुवा कन्स्ट्रक्सन, नेपाली सेना व चीन सरकारपाखें यानाः स्वंगू बिस्कं बिस्कं खण्डय् ज्या जुयाच्वंगु खः । गल्छीनिसें मैलुङ तकया ४६ किलोमिटर सतकया ज्या कोभेक–टुण्डी–रसुवा कन्स्ट्रक्सनं यानाच्वंगु दु ।

रसुवाया मैलुङनिसें स्याफ्रुबेसीतक १८ किलोमिटरया ट््य्राक चायेकेगु ज्या नेपाली सेनां यानाच्वंगु दु । सेनां वइगु वैशाख तकया दुने थ्व सतक हस्तान्तरण याइगु लक्ष्य दु । स्याफ्रबेसी निसें रसुवागढी तकया १८ किलोमिटर सतक चीन सरकारपाखें दयेकाच्वंगु दु । मुख्या बजारय् ४ लेन थ्व लँ मख्यात निग लेनया खःसां धादिङया गल्छी बजार व नुवकोटया गंगटे निसें ढुङ्गे बजार तक चार लेनया दयेकेत्यंगु दु ।

गल्छीया मू बजारय् ५०० मिटर व गंगटेनिसें ढुङ्गेतक ५ किलोमिटर सतक दथुइ क्वारी (स्वां पियातयेगु थाय्) सहित ४ लेनया दयेकेगु खँ आयोजना प्रमुख देवकाटां धयादीगु दु । वय्कःया कथं २ लेन सतकया ११ मिटर पिच दयेकेगु जूगुलिं सतकया दथुं निसें जवंखवं १५–१५ मिटर जग्गा अधिग्रहणया निंतिं नापी कार्यालयपाखें लगत संकलन जुयाच्वंगु व गुलि फु उलि याकनं मुआब्जा वितरण यायेत पहल जुइगु खँ नं आयोजना प्रमुख देवकोटां धयादीगु दु ।