भारत पाकिस्तान सेनाया वाकयुद्ध

पाकिस्तानं भारतं यायेफुगु छुं नं कथंया कारवाहीयात कयाः चेतावनी बिसें थःपिंके दुगु परमाणु हतियार पूर्वपाखें वइगु छुं नं कथंया खतरापाखें बचे जुइत विशेष रुपं तयार यानातयागु खँ धाःगु दु ।
भारतया स्थल सेना प्रमुख जनरल विपिन रावतं बुधवाः थःपिनि फौजा पाकिस्तानया परमाणु धम्की विरुद्ध ल्वायेत तयार दुगु व यदि सरकारं आदेश बिल धाःसा भारतीय सेना पाकिस्तानया सीमाय् दुहां वनेत नं तयार दुगु खँ धाःगु खः । भारतीय सेनाध्यक्षया थ्व खँ वयेवं पाकिस्तानया सेनाया प्रवक्ता मेजर जनरल आसिफ गफूरं भारतपाखें जुइगु छुं नं कथंया आक्रमणया सामना यायेत तयार दु धाःगु खः ।
पाकिस्तानी सरकारी टेलिभिजनय् न्ववासें प्रवक्ता गफूरं धाःगु दु, ‘यदि उमिसं पाकिस्तानया धैर्यताया परीक्षा काये चाहे जूगु खःसा काःसां जिउ, तर थुकिया लिच्वः फयेत नं तयार जुयाच्वनेमाः ।’

– एजेन्सी