चिनियाँ रकेट मंगलग्रहपाखे

एजेन्सी – चीनं मंगल ग्रहण अवतरण जुइगु रोबोट छ्वयेगु अभियान अन्तर्गत म्हिगः रकेट प्रक्षेपण याःगु दु। सुरक्षात्मक आवरणं भुनातःगु खुचा चक्का दुगु रोबोट कुबिया वंगु ‘लब मार्च फाइभ’ रकेट चीनया स्थानीय ई कथं बिहिवाः १२:४० बजे वेनचाङ्ग अन्तरिक्ष केन्द्रं प्रक्षेपण याःगु खः ।

थ्व रकेट वइगु फेब्रुअरी तकया दुने मंगल ग्रहया कक्षय् लिक्क थ्यनीगु खँ धाःगु दु। अथे खःसां थ्व रकेटं वइगु निला स्वला तक मंगल ग्रहया सतहय् कुहां वनेगु कुतः याइमखु। बरु थुकिं मंगल ग्रह चाःहिलाः अनया वायुमण्डलया अवस्था सिइकेत वैज्ञानिकतय्त ग्वाहालि याइ । झिंछन्हुया अवधि दुने मंगल ग्रहय् छ्वयेत्यंगु स्वंगः रकेट मध्ये थ्व निगूगु रकेट खः ।

वंगु सोमवाः जक युएईं होप नांया यान मंगल ग्रहय् छ्वःगु खःसा वइगु वालय् अमेरिकी अन्तरिक्ष एजेन्सी नासां न्हूगु पुस्ताया वाहन मंगल ग्रहय् छ्वयेत्यंगु दु। चिनियाँ अभियानया मू लक्ष्य मंगल ग्रहया भूमध्यरेखा स्वयां ठीक उत्तरपाखे च्वंगु युटोपिया इम्प्याक्ट बेसिनय् लाःगु समथर भूभागय् रोबोटयात अवतरण याकेगु जुइ । थुकिं अनया भूगर्भया अध्ययन याइ ।

थ्व रोबोट २४० किलो तौलया जूगु व थुकी याउँक हे चाःहिके फइगु सोलार प्यानलत तयातःगु दु। थ्व रोबोटं मंगल ग्रहय् च्वंगु ल्वहं, लः वा बरफ मालेत ग्वाहालि याइगु खँ धाःगु दु ।