९० दँ दुम्ह ज्याथियात काेभिडया न्हापांगु खाेप बिल

एजेन्सी – उत्तरी आयरल्यान्डया छम्ह ९० दँ दुम्ह ज्याथियात फाइजर व बायोएनटेकं विकास याःगु कोविड १९ विरुद्धया खोप बिउगु दु । मारग्रेट किनान नांया उम्ह ज्याथि मिसा मानव परीक्षण पूवंकेधुंकाः थ्व खोप काःम्ह न्हापांम्ह मनू जूगु दु । मध्य बेलायतया कोवेन्ट्रीइ च्वंगु युनिभर्सिटी अस्पतालय् किनानयात न्हापां खोप बिउगु खः ।

खोप कायेखंम्ह न्हापां व्यक्ति जुइखंगुलिं थःम्ह तसकं गौरवान्वित महसुस यानाच्वनागु खँ किनानं धयादीगु दु । ‘जिगु बुन्हिया छुं न्हि न्ह्यव जितः चूलाःगु थ्व दकलय् बांलाःगु उपहार खः । जितः आशा दु, आः जि सामान्य जीवनय् लिहां वयेफइ, अले न्हूदँबलय् छेँजःपिं नापलायेखनी’ वय्कलं धयादीगु दु ।

किनानं खोप कायेत मेपिंत नं प्रोत्साहित यासें धयादीगु दु, ‘यदि ९० दँया उमेरय् जिं भ्याक्सिन कायेजिउसा मेपिंसं छाय् मजिउ ?’ बेलायतय् ८० दँया च्वय्यापिं हेल्थ हेयरय् लगे जुयाच्वंपिं कर्मचारीतय्त दकलय् न्हापां भ्याक्सिन बिइगु निर्णय यायेधुंकूगु दु । बेलायत फाइजरं विकसित याःगु खोपयात स्वीकृति बिउगु न्हापांगु देय् खः । थ्व खोपयात बहराइनं नं स्वीकृति बीधुंकूगु दु ।

थ्वहे झ्वलय् फाइजरं भारतय् नं खोपया स्वीकृति बिइत निवेदन बिउगु दु । तर भारतय् नं थ्व खाप हयेगुलि समस्या जुइफुगु खँ अनया विज्ञतय्सं धयाच्वंगु दु । थ्व खोप माइनस ७० डिग्री सेल्सियसय् तयेमाः । भारतय् नं थ्व खोप भण्डार यायेगु निंतिं समस्या जुइफुगु विज्ञतय् धापू दु  ।

सम्बन्धित बुखँ

LEAVE YOUR COMMENTS