अस्टेलियाया प्रधानमन्त्रीं मखुगु खँल्हाःगु फ्रान्सया राष्ट्रपतिया द्वपं

एजेन्सी- पनडुब्बी सम्झौतायात कयाः अस्टे्लियाया प्रधानमन्त्री स्कट मोरिसनं थःत मखुगु खँ ल्हाःगु धकाः फ्रान्सया राष्ट्रपति इम्यानुएल म्याक्रों द्वपं बिउगु दु । प्रधानमन्त्री मोरिसनं मखुगु खँ ल्हानाच्वंगु थें च्वंलाः धकाः तःगु छगू न्ह्यसलय् राष्ट्रपति इम्यानुएल म्याक्रों ‘थें च्वः जक मखु, जिं स्यू’ धकाः लिस बिउगु खः । रोमय् जूगु पत्रकार सम्मेलनय् राष्ट्रपति म्याक्रोयात छम्ह अस्टे्लियन पत्रकारं हाकनं मोरिसनयात विश्वास यायेफइ ला धकाः तःगु न्ह्यसलय् म्याक्रों ‘वय्कलं छुं याइ व स्वये मानि’ धकाः लिसः बिउगु खः ।

अस्टे्लियाया प्रधानमन्त्री स्कट मोरिसन व फ्रान्सया राष्ट्रपति इम्यानुएल म्याक्रो रोमय् जुयाच्वंगु जी २० या शिखर सम्मेलनय् नापलाःगु खः । अस्टे्लिया, अमेरिका व बेलायतया दथुइ जूगु सुरक्षा सम्झौता ओकस लिपा अस्टे«लिया व फ्रान्सया दथुइ तनाव शुरु जूगु खः । थ्व हे सम्झौतां यानाः अस्ट्रेलिया व फ्रान्सया दथुइ जूगु अरबौं डलरया पनडुब्बी सम्झौता रद्द जूगु खः ।

अस्टे्लियाया प्रधानमन्त्री स्कट मोरिसनं धाःसा फ्रान्सया राष्ट्रपतिया द्वपं अस्वीकार याःगु दु । प्रधानमन्त्री मोरिसनं थःम्हं मखुगु खँ मल्हानागु बरु परम्परागत पनडुब्बी अस्ट्र्ेलियाया प्रतिरक्षाया निंतिं पर्याप्त मजूगु धकाः फ्रान्सया राष्ट्रपति म्याक्रोयात धयागु धाःगु दु । मोरिसनं निगू देय्या दथुइ हाकनं विश्वास स्थापित यायेगु कुतः शुरु जुइधुकूगु नं धाःगु दु ।

नेपालभाषा टाइम्स

च्वमिया मेमेगु

• एनपिएलय् न्हापांगु शतक, पोखरा व कर्णाली त्यात
• भाषा कानुनय् ढिलासुस्ती
• छायादेवी कम्प्लेक्सया अन्तिम फैसला मंसिर २४ गते छेँ थुनेमाःगु दावी अझ क्वातुल
• भगवान बुद्धया पाजुपिनि नगरय् उत्खनन्
• ३३ दँ लिपा मंकाः खलःया स्वक्वःगु तःमुँज्या रमेशमान पिया न्हूम्ह नायः