झिंच्याम्ह नेपाःमि अमेरिकाया जेलय्

येँ – अवैध रुपं अमेरिकाय् च्वनाच्वंपिं झिंच्याम्ह नेपाःमितय्त ज्वनाः कुनातःगु सीदुगु दु । राष्ट्रपति डोनाल्ड ट्रम्प प्रशासनं आप्रवासन सम्बन्धी नीतिइ कडाइ यायेधुंकाः थुपिं नेपाःमितय्त ज्वनातःगु खः । नेपाःमित लिसें चय्म्ह दक्षिण एशियाली नागरिकतय्त ज्वनाः ओरेगनया छगू झ्यारखानाय् तयातःगु खँ धाःगु दु ।

मानवअधिकारवादी संस्था एसियन प्यासेफिक नेटवर्क अफ ओरेगन नांया संस्थाया कथं नेपालीतय् लिसें ५२ म्ह भारतीयत नं जेलय् लानाच्वंगु दु । अमेरिकाया मध्यस्तरया सेरिडन संघीय जेलय् कुनातःपिं उमित कानुनी अधिकारपाखें तकं बञ्चित यानातःगु खँ नं पिहां वःगु
एसियन प्यासिफिक नेटवर्क अफ ओरेगनं छगू वक्तव्य पिकासें उमित अनुवादकतय्त तकं सीमित रुपं नापलाके बियाच्वंगु व उमित दुव्र्यवहार जुइफुगु अवस्था दुगु खँ धाःगु दु ।

प्यन्हु न्ह्यः तिनि अमेरिकाया सांसदतय् छगू पुचलं नं उगु झ्यारखानाया भ्रमण याःगु खः । उगु पुचलय् दुथ्याःम्ह छम्ह सांसद सुजन बोनामिचीं तारवारं घेरे यानातःगु उगु जेलय् कडा सुरक्षा दथुइ उमित तयातःगु खँ धाःगु दु ।

सांसद बोनामिचिं ज्वनातःपिंसं थःपिनिगु देशय् हिंसा न्यनाच्वंगु व थःपिंत गलत रुपं कारवाही यायेफुगु जूगुलिं शरण कायेत अमेरिका वयागु खँ धाःगु जानकारी बिउगु दु । उमिसं थःपिंत थः वकिलतलिसे तकं खँ ल्हाके मबिउगु खँ कंगु नं सांसद बोनामिचिं धाःगु दु । सांसद बोनामिचिं थःम्हं नेपाली कैदीतलिसे नं खँ ल्हानागु न्ह्यथँगु दु ।

मेखे अमेरिकास्थित नेपाली राजदूत अर्जुनकुमार कार्कीं ज्वनातःपिं नेपालीतय् बारे दूतावासय् छुं जानकारी मवःनिगु खँ धयादीगु दु ।
उमित नापलायेगु निंतिं वकिलतय्सं स्वक्वःतक कुतः यायेधुंकूसां नापलाके मबिउगु खँ एसियन प्यासिफिक नेटवर्कं धाःगु दु । आप्रवासी अधिकारया पक्षय् ज्या यानाच्वंगु ओरेगनया हे मेगु संस्था काउसकीया कार्यकारी निर्देशक एन्ड्रिया विलियम्सं ज्वनातःपिं आप्रवासीत जोखिमय् लानाच्वंगु खँ धाःगु दु । गुलिखे कैदीत विरामी जुयाच्वंगु खबर वयाच्वंसां उमिसं वासः तकं याके मखनाच्वंगु वय्कलं धयादीगु दु ।