बजेट अधिवेशनय् फुक्क कानुनी विधेयक वइगु

येँ – आइतवाः निसें सुरु जूगु संसद अधिवेशन बजेट अधिवेशन जूसां कानुनसम्बन्धी फुक्क धयाथें विधेयक पेश याइगु जूगु दु । कानुनमन्त्री शेरबहादुर तामाङं वइगु असोजया न्हापांगु वालय् दुने दयेकेमाःगु फुक्क विधेयक थ्व हे अधिवेशनय् पेश यायेगु खँ धयादीगु दु ।

थ्व अधिवेशनय् सरकारया नीति तथा कार्यक्रमया लिसें बजेट पेश याइ । थ्व अधिवेशनय् नीति व कार्यक्रम व बजेट सम्बन्धी सहलहय् केन्द्रित जुइमाःगु खःसां वइगु असोज दुने कानुन दयेकेमाःगु संवैधानिक वाध्यता दुगुलिं सरकारं उकी बः बीगु खँ कानुनमन्त्रीं धयादीगु खः ।

संवैधानिक व्यवस्था कथं वइगु असोज २ गते दुने ४१ गू विषयय् १५० गू न्हूगु कानुन दयेकेमाःगु दु ।कानुनमन्त्री तामाङं बजेट अधिवेशन सुरु जुयाच्वंगु इलय् विधेयक संसदय् दर्ता जुइगु खँ धयादिसें मौलिक हक सम्बन्धी कानुनयात विशेष प्राथमिकता बियाः ज्या जुयाच्वंगु खँ कनादीगु दु ।

अथेहे सत्य निरुपण तथा मेलमिलाप आयोग व बेपत्ता यानातःपिनि छानविन आयोग, राष्ट्रिय सभा निर्वाचन, राष्ट्रिय चिकित्सा शिक्षा अध्यादेश व संघीय संसदया महासचिव व सचिवया पारिश्रमिक सम्बन्धी विधेयक नं वइ ।