‘ट्रायल’ बीगु दिं छिं हे ल्ययादिसँ !
येँ- सवारी चालकया अनुमतिपत्रया परीक्षाया निंतिं आवेदन बिउगु दँ दँ दयेधुंकूसां इलय् परीक्षा बी मखनीगु छुं न्हूगु खँ मखु । छखे आवेदन बियाः नं परीक्षा बीत दँ दँ तक पीमाःगु व मेखे अनुमतिपत्र कायेत नं उलि हे पियाच्वनेमाःगु बाध्यता दु ।
तर आः परीक्षाया निंतिं आवेदन बियाः दँ दँतक पियाच्वनेमालीगु बाध्यता अन्त्य जुइगु जूगु दु । थुकथंया बाध्यता अन्त्य जुइगु जक मखु, छिं गुगु दिनय् परीक्षा बीगु खः व नं थम्हं हे ल्यये दइगु जूगु दु ।
यातायात व्यवस्था विभागं न्हापा हे आवेदन बिया तयेधुंकूपिं सेवाग्राहीया परीक्षा सिधयेवं आः सेवाग्राही थम्हं ल्यःगु दिं व फारम जायेकूगु छुं दिंया दुने हे परीक्षा बी दइगु कथंया व्यवस्था यायेत्यंगु दु । सवारी चालक अनुमतिपत्रया परीक्षा निंतिं सेवाग्राहीं थः अनुकूलया दिं ल्यये फइकथंया व्यवस्था मिले यायेगुकथं विभागं तयारी न्ह्याकूगु दु ।
विभागया प्रवक्ता ईश्वरी पनेरुं अनलाइन फाराम जायेकूपिनिगु बाःछिया दुने सुया सुयागु परीक्षा कायेगु धकाः प्रकाशित याइगु जुयाच्वंगु दु । उगु चरणय् पाः वःपिं सेवाग्राहीं गुगु कार्यालय व गुकुन्हु परीक्षा बीगु धकाः ल्यये फइगु नं वय्कलं जानकारी बियादिल ।
विगतय् ल्यं दुपिं सेवाग्राहीया परीक्षा सिधयेधुंकाः सेवाग्राहीं ल्यःगु दिं व फाराम जायेकूगु छुं दिंया दुने परीक्षा बी दइगु व्यवस्था यायेगु कथं न्ह्याः वनाच्वंगु विभागं थौंकन्हय् विगतय् फाराम भरे यानातःपिं सेवाग्राहीया परीक्षा संचालन यानाच्वंगु दुु । अथे हे सवारी अनुमतिपत्र छापे यायेगुया नापं न्हूगु ‘एप्लिकेशन’ नं दयेकेगु तयारी यानाच्वंगु दु ।
यातायात ज्याकुथिं थुलि सिट खाली दु धकाः क्यनेवं खाली जूगु मध्ये थ्वकुन्हु परीक्षा बीगु धकाः बुकिङ यायेमाःगु व बुकिङ नं अनलाइनपाखें याये फइगु वय्कलं कनादिल । बस, हवाइजहाज, सिनेमा हल आदिया टिकट बुकिङ याःथें हे खाली सिट स्वयाः परीक्षा बीगु दिं बुकिङ याये फइगु वय्कलं कनादिल ।
थुकथं बुकिङ याये न्ह्यः सेवाग्राहीयात छगू कोडिङ नम्बर बीगु व उकिया लिधंसाय् यातायात ज्याकुथिं सःतीगु नापं अनलाइनपाखें फाराम जायेकेधुंकाः उकी व्यवस्था मदुगु स्वास्थ्य परीक्षण, नागरिकता पुष्टि याये धाःसा ज्याकुथिइ हे वनेमाःग जुइ ।
न्हापा फराम जायेकाः परीक्षाय् उत्तीर्ण जुइधुंकाः राजस्व पुलेगु व्यवस्था यानातःगु खःसा विभागं आः दयेकाच्वंगु न्हूगु प्रणालीइ न्हापां अनलाइन राजस्व बुझे यायेगु व अनं लिपा जक फाराम जायेके फइगु व्यवस्था यानातःगु दु ।
थौंकन्हय् न्हापा हे फाराम जायेकातःपिं आपालं सेवाग्राहीया परीक्षा काये ल्यं दुगुलिं यातायात व्यवस्था ज्याकुथिं वंगु महिनानिसें अनलाइन फाराम जायेकेगु स्थगित यानातःगु दु ।
LEAVE YOUR COMMENTS