पशुपतिइ हानं विस्थापित याइगु, कोषया न्हूगु गुरुयोजना विरुद्ध स्थानीय जनता आन्दोलित
येँ (नेपालभाषा टाइम्स) – पशुपति विकास कोषं आः पशुपति जःखः च्वंपिं मेपिं स्थानीय जनतायात समेत विस्थापित याइगु कथंया न्हूगु योजना हयेवं अन च्वंपिं स्थानीय जनतां उकिया विरोध शुरु याःगु दु। थ्व स्वयां न्ह्यः नं कोषपाखें थज्याःगु हे योजना लागू यासें पुलांगु ग्वल (देवपत्तन) या स्थानीय जनतायात अनं विस्थापित याना छ्वःगु खः ।
पशुपति विकास कोषं आः हःगु उगु न्हूगु योजनायात कयाः म्हीग थःगु ज्याकुथी याःगु अन्तक्र्रिया ज्याझ्वःयात स्थानीय जनतां विरोध याःगु खः । अन्तक्र्रिया जुयाच्वंथाय् स्थानीय मनूत वनाः नाराबाजी यासें कोषया उगु योजना प्रति असन्तुष्टि प्वंकूगु खः ।
पशुपति विकास कोषया न्हूगु योजना विरुद्ध कुहां वयादीम्ह स्थानीय अभियन्ता जलद वैद्यं ‘नेपालभाषा टाइम्स’ यात कनादी कथं कोषं आः पशुपति क्षेत्र विस्तारया लागिं सछिदँया न्हूगु योजना हःगु दु। थ्व न्हूगु योजनाय् आः चाबही तकया जनतायात विस्थापित यायेगु योजना तयातःगु दु।
कोषं थ्व स्वयां न्ह्यः झिदँ तक लागू जुइगु योजना हःगु खः । उगु योजनापाखें पशुपति देगः जःखः पुस्तौंनिसें छेँ दनाः च्वनाच्वंपिं स्थानीय जनतायात विस्थापित याना छ्वःगु खः । स्थानीय मनूत अन छेँ त्वःताः पिहां वंगु कारणं ग्वल देशय् न्यायेका वयाच्वंगु थीथी परम्परागत जात्रा पर्वत समेत प्रभावित जूगु खः ।
आः हःगु न्हूगु गुरुयोजनाय् पाशुपत क्षेत्रया धार्मिक, सांस्कृतिक व आध्यात्मिक महत्वयात कायम याना तयेगु लागिं थप ज्या यायेमाःगु जुयाः थथे याये त्यनागु खँ न्ह्यथनातःगु दु ।
थ्वहे झ्वलय् उकिया विरुद्ध आन्दोलनरत स्थानीय जनतां थनिंनिसें ब्यानर तयेगु, पर्चा, पोस्टर ब्वयेगु समेत ज्याझ्वः न्ह्याकेगु तयारी यानाच्वंगु खँ वैद्यं कनादिल । थ्व गुरुयोजना कार्यान्वयन यात धाःसा अन च्वंपिं आपालं स्थानीय मनूत विस्थापित जुइगु जूगुलिं स्थानीय जनतां थुकिया विरोध यानाच्वंगु खँ नं वय्कलं कनादिल ।
कोषया थ्व ज्याया विरुद्ध व्यापक प्रचार यानाः जनचेतना थनेमाःगु बिचाः नं वय्कलं तयादिल । थ्व स्वयां न्ह्यः कोषं स्थानीय जनतायात विस्थापित यायेगु योजना हःगु खःसां सुनां नं सरोकार मक्यंगु कारणं स्थानीय जनता बाध्य जुयाः अनं विस्थापित जुइमाःगु खँ न्ह्यँथँसें आःया पालय् अथे मजुइकेत नं वय्कलं सकल ख्यःयात आह्वान नं याःगु दु ।
LEAVE YOUR COMMENTS