क्यानेडियन नेवाः गुथिया विशेष साधारण सभा

येँ(नेपालभाषा टाइम्स)- क्यानेडियन नेवाः गुथि विशेष साधारण सभा जूगु दु । वंगु सेप्टेम्बरय् च्वंगु गुथिया साधारण सभाय् जूगु सहलहपाखें क्वःजिउकथं जूम प्रविधिया माध्यमं विशेष साधारणसभा च्वंगु खः ।

गुथिया नायः प्रकाश प्रधानं सभापतित्वय् जूगु साधारणसभाय् वय्कलं हे लसकुस यानादीगु खःसा आर्थिकलिसें मेमेगु प्रस्तावया बारे सहलह यायेमाःगु जूगुलिं विशेष साधारणसभा सःतेमाःगु जानकारी बियादीगु खः ।

साधारणसभाय् गुथिया मूछ्याञ्जे विमल श्रेष्ठं विशेष साधारणसभाया औचित्ययात कयाः प्रष्ट यानादिसें ज्यासना पुचलय् दुजःया ल्याः, मिसा दुजःया ल्याः ज्यासना पुचलय् च्वंपिं दुजःपिसं पालना यायेमाःगु आचारसंहिता, निःशुल्क कर आवेदन शिविर, युवा अभिनन्दन लगायतया ज्याझ्वः यायेगु प्रस्ताव न्ह्यब्वयादीगु खः । उगु प्रस्ताव विस्तृत सहसहल यानाः पारित याःगु गुथिं जानकारी बिउगु दु । दांभारिं राजेन्द्र महर्जनं न्ह्यब्वयादीगु आर्थिक विवरणया विषयय् नं विस्तृत रुपं सहलह यानाः पारित याःगु खः ।

गुथिया दुजःपिंसं तयादीगु न्ह्यसः व जिज्ञासाया लिसः पदाधिकारीपिंसं बियादीगु साधारण सभाय् न्वकु उत्तम माकःजुं नं नुगःखँ तयादीगु खः । ज्याझ्वलय् छ्याञ्जे सुमन रघुवंशीं सुभाय् देछानादीगु खः।