व्यासायिक भवनं पार्किङ शुल्क काये मदइगु
येँ(नेपालभाषा टाइम्स)÷येँ महानगरपालिका दुनेया व्यावसायिक व सेवाप्रदायक संघसंस्थां सेवाग्राहीयात निःशुल्क सवारी साधन पार्किङ उपलब्ध याके बीमाःगु जूगु दु । निजी मार्ट, रेष्टुरेन्ट, होटल, शपिङ मल, कम्प्लेक्स, अस्पताललिसें स्वास्थ्य सेवाप्रदायक संस्थां निःशुल्क पार्किङ उपलब्ध याकेमाःगु येँ महानगरं न्ह्यथंगु दु ।
येँ महानगर प्रमुख बालेन्द्र शाह (बालेनं) महानगरपालिकाया आर्थिक ऐन २०८०या बारे जानकारी बियादिसें बहुतल्ला, आवासीय, व्यावसायिक भवनय् दुगु व्यवसाय व सेवाप्रदायकयात सम्वद्ध सेवाग्राहीलिसे सवारी साधन पार्किङ वापतया शुल्क कायेगुलिइ निषेध यानागु जानकारी बियादीगु दु ।
व्यावसायिक रुपं हे सवारी पार्किङ प्रयोजनया निंतिं भवन निर्माण यात धाःसा अज्याःगु भवनयात निर्माण सम्पन्न जूगु मितिं पार्किङ प्रयोजनया निंतिं प्रयोग जूगु लागाया १० दँतकया निंतिं सम्पत्ति कर छुटया व्यवस्था यानातःगु दु । निजी भवन वा जग्गाय् शुल्क कयाः पार्किङ व्यवसाय संचालन यानाच्वंम्ह व्यक्ति वा संस्थां धाःसा महानगरपालिकापाखें पूर्व अनुमति कायेमाःगु जुइ ।
पार्किङ प्रयोजन क्यनाः नक्सा स्वीकृत याकेगु तर मेगु हे प्रयोजनया निंतिं उगु थाय् प्रयोग यात धाःसा प्रचलित कानून व महानगरपालिकाया निर्णयकथं कारवाही यायेगु नापं अज्याःगु थासं सम्पत्ति कर सहित अन्य कर असुल यायेगु नं महानगरपालिकां न्ह्यथंगु दु ।
LEAVE YOUR COMMENTS