हयाटलय् आन्दोलनरत मजदुरत ज्याय् लिहांवल

येँ – थनया बौद्धय् च्वंगु फाइभस्टार होटल हयाट रिजेन्सी (तारागाउँ रिजेन्सी होटल्स लिमिटेड)य् आन्दोलन यानाच्वंपिं मजदूरत बुधवाः निसें ज्याय् लिहां वंगु दु । मजदूरतय् आन्दोलन लिपा होटल व्यवस्थापनं होटल हे बन्द यानाबिउगु खः । होटल बन्द जुइवं श्रम तथा रोजगार कार्यालय मजदूरतय् माग पूवंकेत मध्यस्थता यायेगु धाःगुलिं मजदूरत ज्याय् लिहां वंगु खः ।

श्रम कार्यालयं सेवा सुविधा कायेगु सम्बन्धी कानुनी लँ चायेकूगुलिं आन्दोलन दिकाः ज्याय् लिहां वंगु खँ हयाट होटलया ट्रेड युनियनया अध्यक्ष मुक्ति दाहालं जानकारी बियादीगु दु । मजदूरत ज्याय् लिहां वयेवं आः होटल संचालन जुइगु जूगु दु । होटल व मजदूरतय् दथुइ निदँय् छक्वः ९ प्रतिशतया दरं तलब अप्वयेकेगु सहमति जूगु खँ धाःगु दु ।

मेखे अध्यक्ष दाहालं धाःसा मजदूरत लिहां वःसां व्यवस्थापनं अझं बुकिङ्ग खुला मयासे गैरकानुनी रुपं होटल बन्द यानाच्वंगु खँ धयादीगु दु । हयाट होटल सरकारी जग्गा बालं कयाः सरकारयात म्हो जक शेयर बियातःगु खँय् नं विवादय् लानाच्वंगु होटल खः । व्यवस्थापनं थ्व होटलय् निरन्तर घाटा जूगु क्यनाः सरकारी स्वामित्वया तारा गाउँ विकास समितियात म्हो जक शेयर बियातःगु दु ।

मजदूर आन्दोलनया कारणं छवाः न्ह्यवनिसें होटलया सेवा प्रभावित जुयाच्वंगु खः । थ्व लिपा व्यवस्थापनं व्यावसायिक सुरक्षा मदुगु धासें होटलया फुक्क सेवा बन्द याःगु खः

होटलं तारागाउँया ३०४ रोपनी जग्गा कयातःगु दु, तर थ्व जग्गाया म्हो जक मूल्यांकन यानाः तारा गाउँयात बियातःगु ३९ प्रतिशत शेयरयात ९ प्रतिशतय् क्वकया बिउगु खः । अध्यक्ष दाहालं जग्गा व शेयरया विवादया कारणं व्यवस्थापनं होटल बन्द यायेगु लँय् वनाच्वंगु खँ धयादीगु दु । मजदूरतय्सं यानाः होटल बन्द जुल धयाः व्यवस्थापन बिसिउँ वनेत स्वयाच्वंगु वय्कलं द्वपं बियादीगु दु ।

मजदूर आन्दोलनया कारणं छवाः न्ह्यवनिसें होटलया सेवा प्रभावित जुयाच्वंगु खः । थ्व लिपा व्यवस्थापनं व्यावसायिक सुरक्षा मदुगु धासें होटलया फुक्क सेवा बन्द यानाः उकिया जानकारी नेपाल स्टक एक्सचेञ्जयात छ्वःगु खः । २८० कू क्वथा दुगु थ्व होटलय् प्यसलं मल्याक मजदूरतय्सं ज्या यानाच्वंगु दु । थ्व होटल भारतीय लगानीकर्ता राधेश्याम सर्राफया नेतृत्वय् संचालन जुयाच्वंगु खः ।