स्वंगू दूरसञ्चार संस्थाया लाइसेन्स खारेज

येँ – दूरसञ्चार सेवा प्रदायक स्वंगू कम्पनीया लाइसेन्स खारेजी प्रक्रिया न्ह्यःने न्ह्याःगु दु । लाइसेन्स कथं सेवा प्रवाह मयाःगु व बक्यौता ध्यबा तकं मपूगु धासें नेपाल दूरसञ्चार प्राधिकरणं लाइसेन्स रद्द यायेगु प्रक्रिया न्ह्याकूगु खः ।

सेवा प्रदायक संस्थातय्सं थःपिंसं हे लःल्हाःगु ‘रोल आउट प्लान’ कथं सेवा विस्तार मयाःगु व प्राधिकरणयात बुझे यायेमाःगु दस्तुर तकं मपूगुलिं लाइसेन्स खारेज यायेगु प्रक्रिया न्ह्याकूगु खँ दूरसञ्चार प्राधिकरणं धाःगु दु । प्राधिकरणया सम्बन्धित फाँटं लाइसेन्स खारेज यायेगु निंतिं टिप्पणी तकं उठे यायेगु ज्या जुइधुंकूगु खँ धाःगु दु ।

प्राधिकरणं स्वंगुलिं कम्पनीयात छक्वः जरिवाना यायेधुंकूगु दुसा सेवा विस्तार यायेमफुगु कारण व दस्तुर बुझे यायेत हाकनं पौ च्वयेधुंकूगु खँ सीदुगु दु । दूरसञ्चार प्राधिकरणं स्मार्ट टेलिकम, युनाइटेड टेलिकम लिमिटेड (युटीयल) व सिजी कम्युनिकेशन्सया लाइसेन्स खारेज यायेत्यंगु खः ।

स्मार्ट व युटीएलयाके आधारभूत टेलिफोन सेवा व युनिफाइड लाइसेन्स दु । सिजी कम्युनिकेशन्सं धाःसा लिमिटेड मोबिलिटी सर्भिसया जक लाइसेन्स कयातःगु दु । ताः ई तक लाइसेन्स नवीकरण दस्तुर मपूगु व योजना कथं सेवा विस्तार मयाःगुलिं प्राधिकरणं लाइसेन्स खारेज यायेत्यंगु खः ।

प्राधिकरणया कथं स्मार्ट टेलिकमं १ अर्ब ३७ करोड पुलेमानिसा युटीएलं ७७ करोड ७९ लाख पुलेमानि । अथेहे सिजी कम्युनिकेशन्सं २३ करोड ४३ लाख व नेपाल स्याटेलाइटं ७१ करोड ७५ लाख तका ध्यबा पुलेगु ल्यं दनि । थुकिं मध्ये नेपाल स्याटेलाइटं आधारभूत दूरसञ्चार सेवाया लाइसेन्स कयाः कर्णाली व सुुदुरपश्चिम प्रदेशया पहाडी जिल्लाय् सेवा बियाच्वंगु दु ।