
येँ – येँ मनपां आः महानगर दुनेया सामुदायिक स्कूलतय्त गुणस्तरीय दयेका यंकीगु जूगु दु । शैक्षिक ख्यः नं आः स्थानीय निकाय अन्तर्गत लायेवं येँ मनपां निजी स्कूलतय्त गथे खः अथे हे सञ्चालन याकाः सामुदायिक स्कूलतय्गु स्तर थकायेगु नीति दयेकेत्यंगु खँ येँ मनपाया मेयर विद्यासुन्दर शाक्यं कनादीगु दु ।
येँ मनपां शैक्षिक क्षेत्र थःगु क्षेत्रय् दुने लाःगुलिं उकियात व्यवस्थित यायेत आः ऐन दयेकेगु ज्या जुयाच्वंगु जानकारी नं मेयर शाक्यं बियादिल । शैक्षिक क्षेत्रयात नियमन यायेगु निंतिं नियमावली पास जुइधुंकूगुलिं आः ऐन दयेकाः न्ह्याः वनेगु तयारी जुयाच्वंगु जानकारी नं वय्कलं बियादिल । वय्कलं निजी विद्यालययात आः थें तुं सञ्चालन याका तयेगु तर सामुदायिक विद्यालययात धाःसा गुणस्तरीय दयेकेगु कथं थःपिंसं योजना दयेकाच्वनागु खँ कनादीगु दु ।
वय्कलं धयादी, ‘निजी स्कूलयात गुगुं नं कथंया अंकुश तयेगु ज्या जुइ मखु, तर सामुदायिक विद्यालयया स्तर उन्नति यायेगु जुइ ।’ विद्यालयया नियमन नं मनपां मयासे वडायात जिम्मा बीगु तयारी जुयाच्वंगु खँ कनादिसें वय्कलं धयादी ‘वडाया स्कूल स्वयेगु जिम्मा वडायात हे बीगु जुइ । थथे जुल धाःसा थःगु वडाया स्कूलया स्तर उन्नति यायेत वडा थः हे सक्रिय जुइ ।’
LEAVE YOUR COMMENTS