लानिपुखू व बाग दरवार दयेकीगु

येँ – तःभुखाचं क्षति जूगु लानिपुखू व बागदरवार पुनर्निर्माणया लागिं येँ मनपाय् निगू व न्यागू आशयपत्र पेश जूगु दु । भुखाचं क्षति जूगु लानिपुखू थीथी विवादं यानाः स्वदँ दयेधुंकाः नं दयेकेगु मफयाच्वंगु खः । कामपां वंगु महिनाय् लानिपुखू दयेकेत आशयपत्र माग याःगु खःसा उकी निगू कम्पनीं आशयपत्र पेश याःगु खः ।

पुरातत्व विभाग व मनपा दथुइ ब्वलंगु विवादं यानाः लानिपुखूया शैली तकं क्वःजी फयाच्वंगु मदु । पुरातत्व विभागं गुम्बज शैलीं धयाच्वंगु दुसा सम्पदाविद्तय्सं धाःसा मल्लकालीन (ग्रन्थकुट) शिखर शैलीं दयेकेमाः धयाच्वंगु दु । लानिपुखू दयेकेगु ज्या सुयात बीगु धइगु बारे बोलपत्र मूल्यांकन समितिं निन्हुया दुने निर्णय याइगु खँ धाःगु दु ।

बागदरवार नं दयेकीगु ः
हाल मनपाया ज्याकू दुगु बागदरवार थुनेगु निंतिं न्यागू कम्पनीं इच्छा प्वंकूगु खँ मनपां धाःगु दु । उगु भवन याकनं थुनेगु निंतिं खरिद प्रक्रियाय् यंकेगु खँ मनपाया सहप्रवक्ता नमराज ढकालं कनादीगु दुु । थुनेगु ज्या न्ह्याःगु स्वलाया दुने क्वचाइगु खँ नं धाःगु दु ।

बागदरवार दयेकेगु निंतिं १ अर्ब ५० करोड तका तुइगु अनुमान यानातःगु दु । दयेकेगु ज्या न्ह्याःगु स्वदँया दुने सम्पन्न यायेगु तयारी जुयाच्वंगु खँ नं सीदुगु दु ।