महानगरया दकलय् तःधंगु वडा भवनया शिलान्यास

येँ -येँ महानगरपालिका वडा नं. १६या न्हूगु भवन निर्माणया निंतिं शिलान्यास याःगु दु । येँ महानगरपालिका प्रमुख विद्यासुन्दर शाक्यं वंगु शनिवाः वडा भवनया शिलान्यास यानादीगु खः ।

वडा भवन निर्माणया निंतिं वंगु साउन २९ गतेया कार्यादेश बिउगु खः । वैदिक मन्त्रोचारणलिसें जूगु वडा भवन शिलान्यास येँ महानगर प्रमुख शाक्यं यानादीगु खःसा अमरगढी नगरपालिकाया प्रमुख विश्वेश्वरप्रसाद ओझा (विपिन), येँ महानगर उपप्रमुख हरिप्रभा खड्गी श्रेष्ठ, प्रमुख प्रशासकीय अधिकृत राजेश्वर ज्ञवाली, १६ वडाअध्यक्ष मुकुन्द रिजाल व वडादसदस्यपिंसं पुजा यानादीगु खः ।

शिलान्यास लिपा जूगु ज्याझ्वलय् नवासें येँ महानगर प्रमुख शाक्यं महानगरया सेवा व्यवस्थित रुपय् प्रवाह यायेत सुविधा सम्पन्न भौतिक पूर्वाधारया आवश्यक जूगु खः थ्व विषयय् वडा भवनया खँ न्ह्यःने वइगु जूगुलिं आपालं वडा भवनत शिलान्यास यायेगु ज्या जुयाच्वंगु जानकारी बियादिल । वय्कलं वडावासी व सेवाग्राहीयात सेवा बीत सुविधा सम्पन्न भौतिक पूर्वाधारया खँय् दकलय् न्ह्यःने वइगु वडा भवन शिलान्यास यायेगु जक मखसे आपालं वडा भवनया उलेज्या तकं जुइधुंकूगु खँ कनादिल ।

शिलान्यास लिपा निर्माणाधीन वडा भवनत थःपिनिगु कार्यकाल लिपा उलेज्या जुइ धासें वय्कलं धयादिल, ‘छुं छुं भवन शिलान्यास जक मखु उलेज्या नं जुइधुंकूगु दु, छु वडाया भवन निर्माण सम्पन्न जुइगु चरणय् थ्यनाच्वंगु दु । अज्याःगु वडा भवनत थःपिनिगु कार्यकाल लिपा उलेज्या जुइ ।’

थःपिं निर्वाचित जुया वयेधुंकाः कार्यपालिकाया न्हापांगु बैठकं याःगु निर्णयकथं महानगरया थःगु हे भवन व वडा भवन निर्माण यायेगु ज्या प्रभावकारी रुपं कार्यान्वयन जुयाच्वंगु वय्कलं धयादिल । अथे खःसां छुं छुं वडा भवन निर्माणयात रोके याना बीगु प्रवृत्तिया कारणं कुतः ताः मलानाच्वंगु धासें वय्कलं थःपिंसं छुं वडा भवन निर्माण यायेगु योजनायात सार्थक याये फयाच्वंगु मदु धयादिल । । मुद्दा तयाः रोके याना बीगु प्रवृत्तिया कारणं महानगरया केन्द्रीय ज्याकू निर्माण यायेगु योजना तकं लिज्याः वनाच्वंगु वय्कःया धापू दु ।

उपप्रमुख खड्गी श्रेष्ठं गुणस्तरीय सेवा सुविधा सम्पन्न वडापाखें जक प्राप्त याये फइगु खँ न्ह्यथनालिसें स्थानीय शासनया निंतिं जग बल्लायेमाः धयादिल । ज्याझ्वलय् अमरगढी नगरपालिकाया प्रमुख ओझा, १६ वडाअध्यक्ष रिजालं नं नुगःखँ तयादीगु खः ।

मुक्कं १ रोपनी ४ आना २ पैसा क्षेत्रफलय् निर्माण जुइत्यंगु वडा भवन महानगर दुनेया वडामध्ये दकलय् तःधंगु वडा भवन खः । भवनया भूमिगत तल्लाय् १० गः चारपांग्रे सवारी साधन पार्किङया क्षमतालिसें लिफ्टसहित अपांगमैत्री जुइ । भवनया पिने मोटरसाइक पार्किङ नापं हरियाली नं दइ ।

भवन निर्माणया निंतिं १० गू करोड २७ गू लख ३७,३१० तका लागत अनुमान याःगु खःसा बोलपत्रया माध्यमं याःगु खुल्ला प्रतिस्पर्धाय् निर्माण कम्पनीं ७ गू करोड ५३ गू लख २२,६४० तकां यायेगु कबोल याःगु खः ।