निसः दँ पुलांगु दिप जिर्णोद्वार

येँ- येँ महानगरपालिका वडा नं. १५ लखुतीर्थय् च्वंगु निसः दँ स्वयां पुलांगु दिप जिर्णोद्वार क्वचाःगु दु । श्री अशोक विनायक गुथिया पहलय् लखुतीर्थ दिप सुधार व जिर्णोद्वार समितिपाखें दिप जिर्णोद्वार याःगु खः ।

दिप जिर्णोद्वारया ज्या क्वचाःगु लसताय् छगू ज्याझ्वःया दथुइ जिर्णोद्वारया ज्याय् आर्थिकलिसें थीथीकथं ग्वाहालि यानादीपिंत हनेज्या नं याःगु खः । समितिया सल्लाहकारलिसें ज्येष्ठ नागरिक समाजसेवी सुवर्णमान डंगोलया प्रमुख आतिथ्यताय् जूगु ज्याझ्वःया झ्वलय् आर्थिकलिसें थीथी ग्वाहालि यानादीपिनिगु नां धलः दुगु ल्वहंपौ, लखुतीर्थ दिप (मसान) नांया लुमन्ति पौ नं पितब्वज्या याःगु खः ।
मूपाहां डंगोलंलिसें नेपाल कम्युनिष्ट पार्टी (एकीकृत समाजवादी)या केन्द्रीय दुजःलिसें येँ क्षेत्र नं ८या प्रतिनिधिसभा सदस्य जीवनराम श्रेष्ठ, येँ महानगरपालिका १५ वडाअध्यक्षलिसें महानगर प्रवक्ता ईश्वरमान डंगोल, ज्यापु संस्कृति विकास कोषया नायः मंगल महर्जन, १५ वडासदस्य मैयाँलक्ष्मी महर्जनपिंसं आर्थिक, भौतिक नापं थीथीकथं ग्वाहालि यानादीपिंत दिप जिर्णोद्वारय् थीथीकथं ग्वाहालि यानादीपिंत दोसल्ला न्ययेकाः, हनापै प मतिनाया चिं लःल्हानादीगु खः ।

ज्याझ्वलय् प्रतिनिधि सभा सदस्य श्रेष्ठं इतिहास कुबियाच्वंगु सम्पदा संरक्षण मयात धाःसा अज्याःगु सम्पदा तना वनीगु व न्हना वनीगु सम्भावना दु धासें संस्कृति व सम्पदालिसे प्रत्यक्ष स्वानाच्वंगु मृत्यु संस्कार परम्परा झीगु संस्कारलिसे स्वानाच्वंगु दु धयादिल । दिपयात संरक्षण यायेगु झ्वलय् न्हूगु वैज्ञानिक ढंगं रुपान्तरण यानायंकेमाः धयादिल ।

वडाअध्यक्ष लिसें प्रवक्ता डंगोलं दिपया संरक्षण व जिर्णोद्वारया ज्या स्थानीय मोडलकथं जूगु खँ कनादिसें मनू जीवनया अन्तिम लक्ष्य धइगु हे दिप जूगु व थुकियात सकसिनं अपनत्व क्यने फयेकेमाः धयादिल ।

जिर्णोद्वार समितिया नायः मचाम महर्जनया सभापतित्वय् जूगु ज्याझ्वलय् समितिया सचिव पुरुषोत्तमलाल सिंह, दुजः शंकर महर्जनं नं नुगःखँ तयादीगु खःसा कोषाध्यक्ष मोहननारायण महर्जनं जिर्णोद्वारया ल्याःचाः न्ह्यब्वयादीगु खः ।

निसः दँ पुलांगु उगु ऐतिहासिक दिप सांसद विकास कोष व थीथी दाताय् ग्वाहालिं जिर्णोद्वार याःगु खः ।

सम्बन्धित बुखँ

LEAVE YOUR COMMENTS