येँ महानगरपालिकाया नीति तथा कार्यक्रम पारित, ‘नो भेहिकल’ ग्वसाः लित काल

येँ (नेपालभाषा टाइम्स)- ताःई न्ह्यवंनिसें जुयाच्वंगु विवाद समाधान यासें येँ महानगरपालिकाया नीति तथा कार्यक्रम व बजेट म्हिगः सर्वसम्मतं पारित जुल । मनपाया मेयर बालेन साहं हःगु नीति तथा कार्यक्रमय् येँ मनपा २२ वडाय् लाःगु न्हूसतक लागाय् गाडी दुमकायेगु कथं ‘नो भेहिकल जोन’ घोषणा यायेगु कार्यक्रम नं दुथ्याकातःगुलिं उकी येँया वडा अध्यक्षतय्सं विरोध याना वयाच्वंगु खः ।

नीति तथा कार्यक्रमया थ्व बुँदा संशोधन यायेत मेयर साह तयार जुइवं म्हिगः नीति तथा कार्यक्रम पारित जूगु खः । नीति तथा कार्यक्रमया थ्व बुँदा संशोधन यायेगु लागिं म्हिगः नेपाली कांग्रेसपाखें १७ वडाया अध्यक्ष लिसें प्रवक्ता नविन मानन्धर, नेकपा (एमाले) पाखें ३२ वडाया अध्यक्ष नवराज पराजुली व नेकपा (एस) पाखें १५ वडाया अध्यक्ष ईश्वरमान डंगोलं मंकाः कथं संशोधन तयादीगु खः । मेयर साहं थ्व संशोधनयात समावेश यायेगु बचं बीवं म्हिगः नीति तथा कार्यक्रम पारित जूगु खः । म्हिगः च्वंगु नगर परिषद् बैठकया न्हापांगु बुँदाय् हे मेयर साहं वडा अध्यक्षतय्पाखें वःगु संशोधन प्रस्तावयात कःघाना वनेगु जुइ धकाः बचं बीवं उकियात पारित याना छ्वःगु खः ।

थीथी दलपाखें प्रतिनिधित्व याना वःपिं थ्व वडा अध्यक्षतय्सं थ्व संशोधन प्रस्ताव उकुन्हु हे तःगु खः । यदि मेयरं थ्वयात उकुन्हु स्वीकार याःगु खःसा थ्व विवाद थपाय्हाकः ताःहाकः मजुइगु खः । वय्कलं अबले कडा रुपं अडान काःगु खःसां आः संशोधन स्वीकार याःगु कारणं छुं विवाद पिहां मवल ।

म्हिगः मेयरपाखें संशोधन प्रस्ताव स्वीकार यायेगु धायेवं बैठक सुचारु रुपं न्ह्याः वंगु खः । करिब निघौया दुने बैठक हे क्वचाल । उकुन्हु विवादया दथुइ हे पेश याःगु बजेट नं म्हिगः पारित जूगु खः । येँ मनपाया उपमेयर सुनिता डंगोलं उकुन्हु २५ अर्ब ७० करोड तकाया बजेट पेश याःगु खः । बजेटय् नं छुं संशोधन प्रस्ताव वःगु खःसा उकियात समेत कःघानाः बजेट पारित जूगु खः । बजेट पारित जूसां उकी ध्यबाया बाँडफाँड अझं पूवंक मजूनि । आः संशोधन प्रस्ताव वःकथं ध्यबाया बाँडफाँड यानाः बजेट कार्यान्वयन याना छ्वइगु खँ धाःगु दु ।

थ्व सकारात्मक खँ खः–चिनीकाजी
न्हूसतकय् गाडी व पार्किङ बन्द याःगु विरुद्ध संघर्ष याना वयाच्वंम्ह येँ २२ वडाया वडा अध्यक्ष चिनीकाजी महर्जनं म्हिगः नीति तथा कार्यक्रम पारित जूगुयात सकारात्मक रुपं कायेमाःगु खँ धयादीगु दु । दलीय संयन्त्रया न्ह्यःने निर्दलीय मेयरं छुं याये मफयाः संशोधन प्रस्ताव स्वीकार याःगु खँ कँसें वडा अध्यक्ष महर्जनं थुकियात येँया वडा अध्यक्षत छगू कथं विजय जूगु अर्थय् कायेमाःगु खँ कनादिल । न्हूसतक चिब्या यायेगु मेयरया ज्यायात विरोध यात धकाः वय्कलं छक्वलं हे न्हूसतक लागाय् सवारी साधन हे बन्द यायेगु धकाः घोषणा यानादीगु खः । तर वय्कःया उगु योजनायात येँया फुक्कं वडा अध्यक्षतय्सं मंकाः कथं विरोध याःगु खः । नो भेहिकल योजना लित काःसां न्हूसतकया पार्किङ समस्या धाःसा अझं समाधान मजूनि ।