कोरोना भाइरस : महामारी घोषणाया लच्छि

येँ – चीनया वुहान शहरं सुरु जूगु कोरोना भाइरस (कोभिड-१९) थौं विश्वन्यंक थ्यनेधुंकूगु दु । वंगु दँया डिसेम्बर महिनाय् सुरु जूगु कोरोना विश्वन्यंक न्यनेवं विश्व स्वास्थ्य संगठनं कोभिड-१९यात मार्च ११ तारिक कुन्हु महामारीया घोषणा याःगु खः । शनिवाः महामारी घोषणा याःगु लच्छि थ्यंगु दु । थुगु लच्छिया दुने जूगु न्यता मूमू खँ थुकथं दु :

संक्रमित व सीपिं अप्वल
महामारीया घोषणा याये न्ह्यः कोरोनाया कारणं सीपिं ४ हजार ३००म्ह जक दुगु खःसा लच्छिया दुने थुगु ल्याः थहांवना १ लख ३ हजार थ्यंगु दु । अथेहे लच्छिया दुने संक्रमिततय् ल्याः छगू लखं १७ लखं थ्यंगु दु । अथेहे वासः यानाः ल्वय् लायेकेधुंकूपिं ३ लख ८० हजार दुगु खँ जोन हप्किन्स विश्वविद्यालयं धाःगु दु ।

चीनय् संक्रमण म्हो जुयावन
उखे चीनय् धाःसा कोरोनाया संक्रमण म्हो जुयावंगु दु । मार्च १८ तारिक कुन्हु न्हूम्ह स्थानीय संक्रमित छम्ह नं न्हूगु मदुगु खःसा अप्रिल ७ तारिक कुन्हु छम्ह नं मनू मसीगु खः । कोरोना सुरु जूगु वुहान शहरया अवस्था सामान्य जुयावयाच्वंगु दु । झिंछवाः तक जूगु लकडाउनया अवस्था सरकारं चीकेधुंकूगु दु ।

युरोप न्हूगु केन्द्रविन्दु, अमेरिका मेगू जुइफुगु
युरोपय् धाःसा कोरोनाया संक्रमण छक्वलं अप्वयावंगु दु । इटाली, स्पेन, जर्मनी, फ्रान्स लगायतया देशय् संक्रमणं यानाः सीपि अप्वया वनेवं आः कोरोनाया केन्द्रविन्दु हे आः युरोप जुयाच्वंगु दु । प्यंगूलिं युरोपियन देशय् संक्रमिततय् ल्याः चीनय् स्वयां अप्व जूगु दु ।

उखे अमेरिकाय् ५ लख स्वयां अप्व मनूत संक्रमित जूगु दुसा इटाली धुंकाः दकलय् अप्व सीपिं दयेधुंकूगु दु । संयुक्त राष्ट्र संघं युरोप धुंकाः आः अमेरिकायात कोरोनाया केन्द्रविन्दु जुइगु खँ धायेधुंकूगु दु ।

विश्वन्यंक लकडाउन अप्वल
न्हिया न्हिथं लकडाउन, कर्फ्यू व सीमा नाका बन्द यायेगु न्हून्हूगु बुखँ वयाच्वंगु दु । मार्च २७ तारिकय् छगू अर्ब मनूत दुगु भारतं नीछन्हुया लकडाउन याःगु खःसा दक्षिण अफ्रिकां नं अज्याःगु हे लकडाउन याःगु दु । उखे टर्की, साउदी अरेबिया व तुनिसियां नं लकडाउन याःगु दुसा युएई व जोर्डनं कर्फ्यू या घोषणा याःगु दु । थीथी देसं संक्रमणयात पनेगु निंतिं थज्याःगु लकडाउनया उपाय नालाकाःगु खः ।

अमेरिका व जापनय् नं संक्रमणया ल्याः अप्वयेवं निगूलिं देशय् संकटकालया घोषणा याःगु दु ।

विश्व स्वास्थ्य संगठनयात ख्याच्वः
विश्व स्वास्थ्य संगठनं महामारीयात कयाः यानाच्वंगु ज्या बारे कुंखिनेगु ज्या जूगु दु । अमेरिकी राष्ट्रपति डोनाल्ड ट्रम्पं स्वास्थ्य संगठन महामारी बोर गैर जिम्मवार जूगु व चीनया धापू जक न्ववानाच्वंगु धासें अमेरिकां याइगु ग्वाहालि तकं दिकेगु ख्याच्वः बिउगु दु ।

स्वास्थ्य संगठनं राष्ट्रपति ट्रम्पया अज्याःगु धापु प्रति आपत्ति प्वंकूसें थज्याःगु इलय् भाइरसया राजनीति मायायेत इनाप याःगु दु ।

(स्राेत : अलजजिरा)