थःगु हे पोस्टय् ४१ गोल, प्यंगू क्लबयात प्रतिबन्ध

एजेन्सी- दक्षिण अफ्रिकाय् प्यंगूगु डिभिजन प्यंगू क्लबयात गुबलें हे फुटबल म्हिते मदइकथं प्रतिबन्ध तयाबिउगु दु । उपाधीया प्रतिस्पर्धा दुगु शीर्षस्थानया क्लब माटियासी फुटबल क्लब व शिभुलानी डेन्जर्स टाइगर्सं म्हितूगु कासाय् अजूचायापुक गोल जुइगु प्रतिबन्ध तयेमाःगु खः ।

टाइगर्सं कोटोको ह्याप्पी बोइजयात छुं ई न्ह्यः म्हितूगु कासाय् ३३–१ गोलं बुकूगु खः । अथेहे माटियासीं स्वंगूगु थासय् लानाच्वंगु नसामी माइटी बर्डसयात ५९–१ गोलं बुकल । नसामीं ५९ गोलं त्याकूगु कासाय् माइटी बर्डस्या कासामितय्सं ४१ गोल ला आत्मघाती याःगु खः ।

थुपिं क्लबतय्सं मिलोमतो यानाः कासा म्हितूगुलिं प्यंगूगु थासय् लाःगु गावुला क्लासिकयात मोपनी क्षेत्रया लिग विजेता घोषणा याःगु दु । फाइनल कासा न्ह्यः तक शिभुलानी ३ अंकं न्ह्यःने लानाच्वंगु खः । शिभुलानीयात उपाधी त्याके मबिइगु निंतिं नदिन माटियासी व नसामीं म्याच फिक्सिङ याःगु खः ।

न्हापांगु हाफय् माटियासी २२–० गोलं न्ह्यःने लानाच्वंगु सिइवं सिभुलानीं कोटोको ह्याप्पी ब्वाइजलिसे मिलोमतो यात, अले उगु क्लबया प्यम्ह कासामितय्सं कासा क्वचाये न्ह्यः हे त्यान्नुया म्हितेमफुत धकाः मैदान त्वःता बिउगु खः । मेखे माटियासीलिसेया कासाय् नं रेफ्रीं ह्याउँगु कार्ड क्यंगुलिं नसामी न्हय्म्ह कासामिइ सीमित जूगु खः । थुकथं म्याच फिक्सिङ्ग यानाः म्हितूगुलिं क्लबया पदाधिकारीतय्त न्यागू सिजनया निंतिं व कासा अधिकारीतय्त १० गू सिजनया निंतिं प्रतिबन्ध तःगु खः ।

‘थुपिं मनूतय्के फुटबलप्रति सम्मान धयागु हे मदु, उकिं थज्याःगु हाकनं हाकनं जुइकेगु पक्षय् जिपिं मदु’ दक्षिण अफ्रिकाया मोपनी क्षेत्रया
फुटबल अध्यक्ष भिन्सेन्ट राम्फागों धाःगु दु ।

थुपिं क्लबया कासामितय् बारे धाःसा छुं न्हि लिपा प्रतिबन्ध निर्णय याइगु जूगु दु । छगू गोलविरुद्ध ३३ गोलं पराजित जुइ कथं मैदान त्वःतावंपिं कासामितय्त कडा प्रतिबन्ध तयेफु धाःगु दु ।

थथे लाक्वपाक्व गोल याःबलय् रेफ्रीं सुनां गोल यात धयागु तकं रेकर्ड तयेमफुगु जुयाच्वन । ‘जिमिगु अनुसन्धानं छु खनेदत धाःसा माटियासीं याःगु धाःगु गुलिखे गोल ला गोल हे मखुथें च्वं । छाय्धाःसां रेफ्रीं थःगु रिपोर्ट बांलाक गोलया रेकर्ड तकं बीमफुत’ राम्फागाें धाःगु दु ।

‘रेफ्रीं २ नम्बरया कासामिं १० गोल ५ नम्बरया कासामी २० गोल’ धकाः गाज्यांमाज्यां रिपोर्ट बिउगु दु । अन ४१ गू गोल ला थःगु हे पोस्टय् जूगु जुयाच्वन । रेफ्री थुकिया रेकर्ड गुकथं तल धयागु हे धायेमफु’ राम्फागों धाःगु दु ।

नसामी माइटी बर्ड्सया प्रशिक्ष नेल त्वालां राष्ट्रिय रेडियो स्टेशनय् अन्तर्वार्ता बीगु झ्वलय् रेफ्रीया कारणं थथे जूगु द्वपंबिउगु दु । ‘जिमिसं प्यंगू गोल यायेधुनागु खः, तर रेफ्रीं छगू नं गोलयात मान्यता मबिउ । तर उमिसं थ्वाःगु बल नेटया पिने लाःसां गोल बिल । थ्व बारे जिमिसं उजुरी बिया, तर रेफ्रीया निर्णय हे अन्तिम जुइ धाल । अथे जूबलय् कासामितय् ध्यान कासाय् मवन । कासा त्याःसां छुं जुइमखु धयागु उमित जुल, अले कासामितय्सं तम्वया कासा त्वःताबिल ।’

अफ्रिकी फुटबलय् थज्याःगु अस्वाभाविक लिच्वः वःगु न्हूगु घटना धाःसा मखु । सन् २०१३ य् ७९–० गोल व ६७–० गोलया कासा नं जूगु दु । थज्याःगु कासा म्हितूगु निगू टिमयात १० वर्ष प्रतिबन्ध तःगु खः । तर आःतकया दकलय् उच्च स्कोर जुयाच्वंगु १४९–० गोलयात धाःसा सुनां नं त्वाःथलेफुगु मदुनि । म्याडगास्करया एएस अडेमा व एसओ एल्मर्नदथुया कासाय् प्रशिक्षक व रेफ्रीलिसे विवाद जुइवं कासामितय्सं थःगु हे पोस्टय् गोल यानाः थ्व स्कोर दयेकूगु खः ।

सम्बन्धित बुखँ

LEAVE YOUR COMMENTS