युरोकपया निंतिं नीगू टिम छनोट

सन् २०२० य् जुइगु युरो कपया निंतिं नीगू टिम छनोट जूगु दु । बुधवाः हंगेरीयात बुकुसें वेल्स युरोया निंतिं तप्यंक छनोट जूगु अन्तिम टिम जूगु दु । नीप्यंगू टिम दइगु थ्व धेंधेंबल्लाःया निंतिं आः मेगु प्यंगू टिम धाःसा प्लेअफ पाखें छनोट याइगु जुइ । प्यंगू टिमया निंतिं झिंन्यागू देय् दथुइ प्लेअफ जुइ ।

युरो कपया निंतिं समूह ए पाखें इंग्ल्यान्ड व चेक रिपब्लिक, समूह बी पाखें युक्रेन व पार्चुगल, सी पाखें जर्मनी व नेदरल्यान्ड्स, डी पाखें स्वीट्जरल्यान्ड व डेनमार्क, ई पाखें क्रोएशिया व वेल्स, समूह एफ पाखें स्पेन व स्वीडेन, समूह जी पाखें पोल्यान्ड व अस्ट्रिया, एच पाखें फ्रान्स व टर्कि, आईपाखें बेल्जियम व रसिया व जे पाखें इटली व फिनल्यान्ड छनोट जूगु खः ।

आः मेगु प्यंगू थाय्या निंतिं कोसोभा, बुल्गेरिया, सर्भिया, नर्दन आयरल्यान्ड, बेलारुस, आयरल्यान्ड गणतन्त्र, जर्जिया, हंगेरी, स्लोभाकिया, नर्वे, रोमानिया, मेसेडोनिया, इजरायल, स्टकल्यान्ड व बोस्निया एण्ड हर्जगोभिना दथुइ प्लेअफ कासा जुइ । सन् २०२० या युरो कप जुन १२ निसें जुलाई १२ तक युरोपया थीथी झिंनिगू शहरय् जुइत्यंगु दु ।

म्हिगः वेल्सयात छनोटया निंतिं आरोन राम्सें निगू गोल यात । न्हापांगु हाफय् गारेथ बेलया क्रसय् राम्सें कासाया १५ औं मिनेटय् वेल्सयात अग्रता बिउगु खः । निगूगु हाफया ९० सेकेन्ड दुने राम्सें थप छगू गोल यासें छनोट पक्का याःगु खः । पेनाल्टि एरियाय् बलयात नियन्त्रण यासें राम्सें थ्व गोल याःगु खः ।

सम्बन्धित बुखँ

LEAVE YOUR COMMENTS