निक्वःगु राष्ट्रिय एकायन कराते कासा क्वचाल

येँ – नेपाल एकायन कराते संघ केन्द्रीय समितिया ग्वसालय् व संघया काभ्रे जिल्ला समितिया सह आयोजनाय् जूगु निक्वःगु राष्ट्रिय एकायन कराते कासा क्वचाःगु दु । काभ्रेया भोतय् च्वंगु पोलिटेक्निक कासा ख्यलय् वंगु माघ १२ व १३ गते निन्हुयंकं जूगु खः । मुक्कं च्यागू तौल समूहय् न्हय्गुलिं प्रदेशया यानाः सछि व नीम्ह कासामिं ब्वति काःगु कासाया उलेज्या मूपाहां भोत नगरपालिकाया प्रमुख लक्ष्मीनरसिंह वादे श्रेष्ठं यानादीगु खः । कासाया उलेज्या यासें नगरप्रमुख श्रेष्ठं काभ्रे जिल्लाय् न्यना वनाच्वंगु कासाया गतिविधियात ग्वाहालि यायेत थः व थःगु अभिभावकत्वय् दुगु नगरपालिका न्ह्याबलें तत्पर जुयाच्वनी धयादिल ।

निन्हुयंकं जूगगु कासाय् मिजंपाखे ३०, ३५, ४०, ५०, ५५ केजीं क्वय्या तौल समूह व मिजं खुल्ला तौल समूह नापं मिसातय्गु ४५ केजीं क्वय् व ४५ केजीं च्वय्या तौला समूहय् नकआउट कासा जूगु खः । कासाय् मिजंपाखे ३० केजी तौल समूहय् एलिस राई (येँ) न्हाप, अनिज क्षेत्री (येँ) लिउ व कृष्ण भुसाल (पर्वत) लियांलिउ लाःगु खःसा शुशान्तकुमार यादव (बाँके) हःपाः लाःगु खः । अथे हे मिजंपाखे हे ३५ केजीं क्वय्या तौलय् विकास शाही (बाँके), सोम घले (धादिङ), दिछाल मगर (भोजपुर) व उज्वल दर्नाल (धरान) छसिकथं न्हाप, लिउ, लियांलिउ व प्यंगूगु थासय् लाःगु दुसा ४० केजीं क्वय्या समूहय् मुस्कान पुन मगर (येँ), सुभास शाही (बाँके), शिवा गुप्ता (बाँके) व सनी तामाङ (काभ्रे) छसिकथं न्हाप, लिउ, लियांलिउ व प्यंगूगु थासय् लाःगु दु ।

५० केजीं क्वय्या समूहय् सजिन महर्जन (येँ) न्हाप, संन्तोष श्रेष्ठ (येँ) लिउ व जनिप परियार (मकवानपुर) स्वंगूगु, ५५ केजी क्वय्या समूहय् सुरेश मगर (महोत्तरी) न्हाप, मिलन बस्नेत (गोर्खा) लिउ, जयमान तामाङ (नुवाकोट) लियांलिउ र बिशाल थापा (बाग्लुङ) प्यंगूगु थासय् लाःगु दु । ५५ केजीं च्वय्या समूहय् किशोर पाख्र्रिन (येँ) न्हाप, निकिल बोगटी (येँ) लिउ, अन्सुमन चौधरी (बर्दिया) स्वंगूगु व विजय तामाङ्ग (नुवाकोट) प्यंगूगु थासय् लाःगु दु ।

थुकथं हे मिसातय्गु कासा अन्तर्गत ४५ केजीं क्वय्या तौलय् मनिसा घले (धादिङ) न्हाप, सल्मा खातुन (पर्सा) लिउ, विधाता राई (भोजपुर) लियांलिउ व सोनाम तामाङ (धादिङ) प्यंगूगु थासय् व ४५ केजीं च्वय्या तौलय् सोनी लगुन (येँ), आयुषा महर्जन (येँ), प्रकृति स्थापित (येँ) व सुजाता सुन्दास (मकवानपुर) छसिकथं न्हाप, लिउ, लियांलिउ व प्यंगूगु थासय् लात । विजयी कासामिपिंत काभ्रे मण्डन देउपुर नगरपालिकाया प्रमुख तोपबहादुर वाईबां शिल्ड, पदक व दसिपौ लःल्हानादीगु खः ।