उम्मेदवारया राजीनामा विवादय् वैशाख ४ गते सर्वोच्चय् सुनुवाइ

येँ (नेपालभाषा टाइम्स)- स्थानीय निर्वाचनय् मनोनयन न्ह्यः बहालवाला जनप्रतिनिधिं राजीनामा बीमाः कि म्वाः धइगु मुद्दाय् सर्वोच्चं वैशाख ४ गते सुनुवाइ याइगु जूगु दु । म्हिगः न्यायाधीशपिं तेजबहादुर केसी व कुमार रेग्मीया मंकाः इजलासं रिट निवेदक, जनप्रतिनिधि व विपक्षी निर्वाचन आयोगयात सहलहया नितिं सःतूगु खः ।

निर्वाचन आयोगं मनोनयन न्ह्यः जनप्रतिनिधिं राजीनामा बीमाः धकाः निर्वाचन आचार संहिताय् न्ह्यथनेवं राजनीतिक दलतय्सं उकिया विरोध याना वयाच्वंगु खःसा सिन्धुपाल्चोक हेलम्बु गाउँपालिकाया अध्यक्ष निमा ग्याल्जेन लामां राजीनामाया व्यवस्था खारेज यायेमाः धकाः सर्वोच्च अदालतय् रिट दर्ता याःगु खः ।

उगु रिटय् सुनुवाइ यासें वंगु चैत ८ गते सर्वोच्च अदालतं राजीनामाया व्यवस्था तत्काल कार्यान्वयन मयायेत अन्तरकालीन आदेश बिउगु खः । म्हिगः निर्वाचन आयोगं उगु अन्तरकालीन आदेश खारेज यायेमाः धासें सर्वोच्च अदालतय् निवेदन बिउगु दु ।

निर्वाचन आयोगं राजीनामा मबिसे स्थानीय तहया निर्वाचनय् उम्मेदवारी बिल धाःसा अज्याःगु उम्मेदवारी खारेज जुइफइगु ख्याच्वः समेत बिउगु दु ।

निवेदनय् स्थानीय तह निर्वाचन नियमावली २०७४ या नियम ५ अनुसूचीया खण्ड ‘थ’ स उम्मेदवार जुइत योग्यता गाःम्ह मनुखं लाभया पद धारण यानाच्वंगु मदु धकाः मनोनयनपौया लिसें स्वघोषणा यायेमाःगु व्यवस्था दु धासें स्थानीय जनप्रतिनिधि लाभया पद मखु धकाः धाये मछिंगु जिकिर आयोगं याःगु दु ।

निर्वाचन आयोगया निवेदनय् धयातःगु दु, ‘स्थानीय तहया गुगुं नं पदय् निर्वाचित वा मनोनित सुं नं पदाधिकारीयात उगु पदय् बहाल जुयाच्वंतले लाभया पद धारण याःगु मखु धकाः निजया मनोनयन पौ स्वीकृत याये जिउगु कानुनी आधार तकं मदु ।’

उकथं हे सर्वोच्च अदालतं चैत ८ गते जारी याःगु अल्पकालीन अन्तरिम आदेश खारेज यायेमाःगु माग नं यानातःगु दु । स्थानीय तह निर्वाचन ऐन, २०७३ या दफा १३ स पारिश्रमिक काइम्ह व्यक्ति स्थानीय तहया निर्वाचनय् उम्मेदवार जुइ मदइगु व्यवस्था दुगु खँ नं आयोगं धाःगु दु । तर जनप्रनितिधिपिंसं धाःसा थःपिंसं पारिश्रमिक मखुसें सुविधा जक कया वयाच्वंगु दावी यायेगु यानाच्वंगु दु ।

जनप्रतिनिधिया धापूयात लिसः बिसें निर्वाचन आयोगं निवेदनय् धयातःगु दु, ‘नेपाःया संविधानया धारा ३०६ (छ) कथं जनप्रतिनिधिं काःगु सुविधा नं पारिश्रमिक जुइ ।’ उगु धाराय् पारिश्रमिक धायेबलय् ‘तलब, भत्ता व मेगु गुगुं नं कथंया पारिश्रमिक तथा सुविधा’ धकाः थुइकेमाः धयातःगु दु ।

वैशाख ३० गते जुइगु निर्वाचनया नितिं ११ व १२ गते मनोनयन दर्ताया ज्याझ्वः तयातःगु दु । मनोनयन दर्ता याये न्ह्यः राजीनामा बीमाःगु खः लाकि मखु धकाः थौंकन्हय् निर्वाचन आयोगय् आपालं मनूतय्सं न्यनेकने याः वयाच्वंगु खँ नं आयोगं सूत्रं धाःगु दु ।

सम्बन्धित बुखँ

LEAVE YOUR COMMENTS