‘खुसि मापदण्डया समस्या सरकारं याकनं समाधान याइ’

येँ (नेपालभाषा टाइम्स)÷ सत्तारुढ दल एमालेया केन्द्रीय दुजः व पुलांम्ह मन्त्री कृष्णगोपाल श्रेष्ठं खुसि मापदण्डयात कयाः सर्वोच्च अदालतं याःगु फैसलां वःगु समस्यायात सरकारं याकनं समाधान याइगु खँ धयादीगु दु । एमाले समर्थित लोकतान्त्रिक नेवाः संघया विशेष भेलाय् न्ववासें वय्कलं थ्व खँ धयादीगु खः । प्रधानमन्त्री केपी ओली नं थ्व फैसलाया विरोधय् दु धासें वय्कलं सरकारं महान्यायाधिवक्तालिसे सहलह यानाः भ्याकेटय् वन धाःसा थ्व समस्या याकनं ज्यनीगु खँ धयादीगु खः ।

नेपाल प्रहरीइ अवकाश बीगु उमेरया खँय् सर्वोच्चं याःगु फैसलां प्रहरी प्रशासनय् हे समस्या वःबलय् सरकार भ्याकेटय् वनाः थुकिया समस्या ज्यंकूगु खँ न्ह्यथँसें वय्कलं धयादिल, ‘सरकार एमालेया दु, अले एमाले नं थ्व फैसलाया विरोधय् दु । एमालें थ्व समस्यायात ‘क्यारी’ याःगु दु । सरकारं महान्यायाधिवक्तालिसे सहलह यानाः सर्वोच्चया फैसलाविरुद्ध पुनरावलोकन वन धाःसा थ्व समस्या तुरुन्त ज्यनी । उकिं थ्व समस्यां प्रभावित जूपिं जनतां यक्व चिन्ता कायेमाःगु मदु ।’

विशेष भेलाय् संघया नायः सत्यनारायण डंगोलं सर्वोच्चया फैसलां स्वनिगःया रैथाने नेवाःतय् उठिबास जुइगु खँ धासें भेलाया न्हापांगु एजेन्डा कथं खुसि मापदण्डयात कयाः सर्वोच्चं याःगु फैसलाय् सहलह यायेगु खँ न्ह्यथंगु खः ।

ज्याझ्वलय् न्ववासें येँ महानगरपालिकाया पुलांम्ह मेयर विद्यासुन्दर शाक्यं स्वनिगःया फुक्क नगरपालिकातय् संगठन मेयर फोरमं हे सर्वोच्चया फैसलाया पुनरावलोकन यायेमाः धकाः वक्तव्य पितबिउगुलिं आः येँ महानगरपालिकाया मेयरं छु याइ धकाः न्ह्यसः तयादिल । वय्कलं येँ मनपाया मेयर आः कि थम्हं मेयर्स फोरम हे त्वःते माल, कि मखुसा थम्हं बियागु सुचंय गलत धायेमाल धकाः नं कनादिल ।

सर्वोच्च फैसलाया पूर्णपाठ वयेवं येँ महानगरपालिकाया मेयर बालेन्द्र साहं महानगर प्रमुखया निर्णय कथं खुसि जःखः ४० मिटर तक छुं नं सरंचना दयेके मबीगु धकाः सुचं पिथंगु खः । मेयर साहया थ्व सुचंयात कयाः तच्वःगु विरोध जुयाच्वंगु दु । मेयर साहं महानगरया बोर्डय् तकं सहलह मयासें थः यकःति यानाः थ्व सुचं पिथंगु खः ।

अथेहे ज्याझ्वलय् न्ववानादिसें यल महानगरपालिकाया उपमेयर मञ्जली शाक्यं सर्वोच्चया फैसलां गज्याःगु समस्या वइ धयागु बारे सकसितं जानकारी बीमाःगु खँ धयादिल । वय्कलं सर्वोच्चया फैसलां थःगु छेँबुँ त्वःतेमालीपिंसं तकं थ्व फैसलां गज्याःगु लिच्वः लाइ धयागु वाःमचाः, उकिं थ्व फैसलां स्वनिगःवासीपिंत गुकथं उठीबास याइ धयागु बारे चेतना थनेमाःगु दु धयादिल ।

ज्याझ्वलय् एमालेया केन्द्रीय दुजः व जनजाति महासंघया पुलांम्ह नायः पासाङ शेर्पा व मेम्ह केन्द्रीय दुजः सुजिता शाक्यं नं सरकारं याकनं थ्व समस्या ज्यंकीगु विश्वास प्वंकादीगु खः ।