किपुली स्थानीय विपन्नतय्त राहत बीगु तयारी
किपू – किपू नगरपालिका दुने च्वनाच्वंपिं असंगठीत क्षेत्रय् ज्या यानाच्वंपिं श्रमिक व असहाय परिवारयात निगूगु चरणया राहत बीगु तयारी सुरु जूगु दु । न्हापांगु चरणय् ४ हजार १०० घरपरिवार व १५०० विद्यार्थीयात राहत बीधुंकाः निगूगु चरणया राहतया तयारी सुरु जूगु खः ।
फुक्कं वडाय् तथ्यांक संकलन ज्या जुयाच्वंगु व वइगु छन्हु निन्हु दुने न्हापा त्वःफिउपिंत निगूगु चरणया राहत बीगु खँ नगरपालिकाया उपप्रमुख सरस्वती रिजथालं कनादिल ।
वय्कलं निगूगु चरणय् स्थानीय विपन्न परिवारयात नं निगूगु चरणय् दुथ्याकेगु खँ धयादिल । न्हापा स्वयां निगूगु चरणय् ७५ निसें ८० प्रतिशत तक राहत वितरण संख्या अप्वइगु अनुमान वय्कःया दु ।
‘न्हापांगु चरणय् राहत वितरणया निंतिं नगरपालिकां स्थापना याःगु आकस्मिक राहत कोषय् तयातयागु ५० लाख खर्च जूगु दु । वैशाखय् कीर्तिपुर महोत्सव संचालन यायेत धकाः तयातःगु १ करोड राहत कोषय् तयागु खः’ नगरपालिकाया प्रवक्ता नं जुयाच्वनादीम्ह उपप्रमख रिजालं धयादीगु दु, ‘थ्व हे ध्यबा राहत वितरणय् खर्च यायेगु नगरपालिकाया बैठकं निर्णय याःगु दु । जिमित व्यक्ति व संस्थापाखें नगद व खाद्य पदार्थ सहयोग जुयाच्वंगु दु ।’
प्यथाय् निःशुल्क नयेगुथाय्
कीर्तिपुर बालं च्वनाच्वंपिं विद्यार्थी व दैनिक ज्यालादारी याइपिं मजदूरतय्त लक्षित यानाः वडाया समन्वयय् थीथी व्यवसायीतय्सं प्यथाय् निःशुल्क नकेगु नं याना वयाच्वंगु दु । नगरपालिकाया नगां द्वातय्, न्हूबजाःया लोकतान्त्रिक चोक, पाँंगाया ध्वाकासी व च्याखा कन्याचौरय् सुथय् ९ निसें ११ बजे तक व सनिलय् ५ निसें ७ बजे तक निःशुल्क नकेगु याना वयाच्वंगु दु ।
प्यंगुलं वडाय् न्हि न्हय्सः निसें च्यासःम्हेसित तक नकेगु याना वयाच्वंगु खँ वडा नं. ९ या अध्यक्ष गंगाराम महर्जनं धयादीगु दु ।
LEAVE YOUR COMMENTS