हिंसा त्याग याःसा वार्ता ः परराष्ट्रमन्त्री ज्ञवाली

येँ – हिंसा त्याग यानाः वःसा जक नेक्रविक्रम चन्द ‘विप्लव’ लिसे वार्ता जुइफइगु खँ परराष्ट्रमन्त्री प्रदीप ज्ञवालीं धयादीगु दु । वय्कलं गुल्मीइ पत्रकारत लिसे खँ ल्हायेगु झ्वलय् उगु खँ धयादीगु खः । वय्कलं हिंसा त्याग यानाः वःसा सरकार वार्ताया निंतिं तयार दुगु खँ कनादिसें हिंसा सुयात नं फाइदा याइमखु धासें हिंसा त्वःता वार्ताय् वयेत नं विप्लव पुचःयात इनाप यानादीगु दु ।

पत्रकारत लिसे खँ ल्हायेगु झ्वलय् वय्कलं धयादी, ‘सरकारयात हिंसा स्वीकार्य मदु । नागरिकया जीउधनया सुरक्षा यायेगु दायित्व सरकारया खः ।’ वय्कलं नागरिकयात गुगुं नं बहानाय् म्हितेगु ज्या यायेमजिउ धासें विप्लव पुचलं हिंसात्मक गतिविधि त्याग यातधाःसा सरकारया वार्ताय् च्वनेत तयार दु धासें धयादी, ‘हिंसा मत्वतेगु खःसा वार्ताया औचित्य मदु, कार्यकर्ता त्वःतेगु निंतिं वार्ता धयां जक मजिउ ।’

थ्वहे झ्वलय् विप्लव पुचःया सक्रिय रुपं ज्या यानाच्वंपिं रुकुमया प्यम्ह कार्यकर्ता विप्लव पुचः त्याग याःगु दु । उमिसं वंगु शुक्रवाः जिल्ला प्रशासन ज्याकुथी उपस्थित जुयाः पार्टी परित्याग याःगु खः । पार्टी परित्याग याःपिं बटमकुमार बुढा, विनोद छिनातल, महेश सुनार व रोल्पाया बालकुमार बुढा जूगु खँ सीदुगु दु । उमिसं छगू प्रेस विज्ञप्ति पिकानाः आवंनिसे विप्लव पुचःलिसे गुगुं नं कथंया स्वापू मतयेगु खँ धाःगु दु ।