स्वलायंकंया धिमे प्रशिक्षण क्वचाल

थिमि(नेपालभाषा टाइम्स)÷ पाचो धिमे खलःया ग्वसालय् जूगु स्वलायंकंया धिमे प्रशिक्षण क्चाःगु दु । वंगु कात्तिकनिसें शुरु जूगु धिमे प्रशिक्षण खुलाया ई क्वःछिनातःगु खःसां औपचारिक प्रशिक्षण धाःसा स्वलाजक बिउगु खः ।

समापन ज्याझ्वलय् मूपाहां कथं झायादीम्ह संघीय सांसद दुर्लभ थापां धर्म, कला, संस्कृति संरक्षणय् न्ह्यचिलादीपिं ल्याय्म्ह पुस्ताप्रति आभार प्वंकादिसें माःथाय् माःकथं ग्वाहालि यायेगु प्रतिवद्धता प्वंकादिल ।

मध्यपुर थिमि नगरपालिकाया प्रमुख सुरेन्द्र श्रेष्ठं नगरया कला, संस्कृतिलिसें बाजंया नं संरक्षण यायेगु ज्याय् नगरपालिकां आवश्यक सहकार्य याना वनेगु जुइ धयादिल । वय्कलं धिमेलिसें मेमेगु परम्पारगत व मौलिक बाजंया नं संरक्षण यायेमाःगु खँय् बः बियादिल ।

नगर उपप्रमुख विजयकृष्ण श्रेष्ठं मूर्त, अमूर्त सम्पदायात पर्यटन व कला प्रदर्शनीयात व्यावसायि करण यना यंकेगु ज्याय् नगरपालिकां सहकाय यायेगु जुइ धयादिल ।
थिमिया जीवित सांस्कृतिक धरोहर श्रीगोपाल प्रजापति मुख्य गुरु व कृष्ण प्रजापति सहायक गुरु जुयाः बियादीगु प्रशिक्षण सुसन प्रजापतिया संयोजनय् जूगु खःसा प्रशिक्षणय् निम्ह मिसां ब्वति कयादीगु खः ।

समापन ज्याझ्वलय् बागमति प्रदेश सांसद धनेश्वरी प्रजापति, मध्यपुर थिमि नगरपालिका ६ वडाअध्यक्ष ज्ञानदास प्रजापति, निवर्तमान उपप्रमुख अञ्जनादेवी मधिकःमि, थिमिया गुंला बाजं व भैलः प्याखंया गुरुलिसें मेपिं आपालं स्थानीयया उपस्थिति दुगु खः ।
औपचारिक समापन लिपा प्रशिक्षार्थीतय् चपाचोस्थित गणेद्यःयाथाय् यंकाः सगं बिउगु खःसा लिपा मंकाःकथं सकसिनं बाजं थानाः प्रस्तुति नं न्ह्यब्वःगु खः ।